Xefe Bankada CNRT, Duarte Nunes. Imajen/Egas Cristovão

DILI, 15 dezembru 2020 (TATOLI)—Bankada Congresso Nacional da Reconstrução de Timorense (CNRT) kompromete sei fiskaliza ezekusaun Orsamentu Jerál Estadu (OJE) ba tinan fiskál 2021.

“Ami la partisipa iha debate (faze espesialidade propostaa OJE 2021), ami-nia titulár nu’udar deputadu to’o mandatu hotu. Enkuandu deputadu, ami iha obrigasaun akompaña sira-nia ezekusaun tuir programa ne’ebé hatuur iha OJE ne’e. ita hotu espera buat hotu-hotu bele la’o di’ak no bele favorese povu nune’e povu bele kontente,” Xefe Bankada CNRT, Deputadu Duarte Nunes, informa liuhosi konferénsia imprensa, iha Parlamentu Nasionál, tersa ne’e.

Bankada CNRT sei fiskaliza orsamentu ne’e ninia implementasaun tuir programa (orçamento por programa) tanba orsamentu aprova ona entaun implementasaun mós tenke bazea ba programa.

Entretantu, membru bankada CNRT, Deputada Maria Fernanda Lay, espera implementasaun orsamentu 2021 ne’e tuir programa.

“Tanba proposta orsamentu ne’ebé Governu hato’o ne’e ko’a orsamentu hosi programa ida ba programa seluk nian. Sera que ministériu bele intende ka lae, ligasaun entre programa no sub-programa ne’e sertu ka lae ka muda de’it númeru programa. Ida-ne’e mak sai peokupasaun,” nia akresenta.

Deputada Maria Fernanda Lay fundamenta, bankada CNRT sei kaer ba relatóriu ezekusaun trimestrál hodi haree tuir sertu ka lae tanba iha dezorsamentasaun iha laran.

Parlamentu Nasionál (PN), sábadu (12 dezembru 2020), aprova ona proposta-lei Orsamentu Jerál Estadu (OJE) ba tinan fiskál 2021 ho montante biliaun $1.895 iha finál  globál.

Proposta-lei no 23/V (3a)-Orsamentu Jerál Estadu ba tinan fiskál 2021 aprova ho rezultadu votasaun a-favór 44, kontra 0 no abstensaun 0.

Proposta-lei OJE ba tinan fiskál 2021 hamutuk biliaun $1.895 kompostu hosi saláriu no vensimentu millaun $ 239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here