Prezidente Repúblika, Francisco Guterres Lú Olo. Imajen António Gonçalves

DILI, 15 dezembru 2020 (TATOLI)—Prezidente Repúblika (PR), Francisco Guterres Lú Olo, aban, sei hala’o vizita traballu iha Munisípiu Baucau to’o loron 18 fulan dezembru tinan 2020.

Komunikadu hosi Prezidénsia Repúblika ne’e haktuir, durante loron-tolu iha Baucau, Prezidente Repúblika sei haree besik kondisaun eskola públika, sentru saúde, atividade produtiva no diálogu ho autoridade lokál no komunidade hodi rona no hatan preokupasaun kona-ba dezenvolvimentu nasionál.

Prezidente Repúblika sei vizita Eskola Sekundária Jerál Kilik Uaigae no Ensinu Báziku Caibada, empreza ACELDA Unip, Grupu Feto Produtores HAFUKU, Ensinu Báziku Sentral Aubaca, Hospital Referál Eduardo Ximenes ‘Horex’, selebrasaun natal hamutuk ho orfaun no ema ho defisiénsia, simbolikamente entrega ai-oan ba Adminstradór Postu Administrativu neen no diálogu ho autoridade lokál no komunidade iha Munisípiu Baucau.

Membru Governu ne’ebé sei akompaña Prezidente Repúblika mak Vise Primeiru Ministru no Ministru Planu no Ordenamentu, Ministru Koordenadór Assuntu Ekonómiku, Ministru Justisa, Ministru Petróleu no Minerál, Ministru Administrasaun Estatál, Ministra Saúde, Ministru Edukasaun, Juventude no Desportu, Ministru Obra Públika, Ministru ba Assuntu Parlamentár no Komunikasaun Sosiál, Ministru Turizmu, Komérsiu no Indústria, Ministru Agrikultura no Peskas, Ministru Asuntu Kombatente Libertasaun Nasionál, Sekretáriu Estadu Ambiente, Sekretáriu Estadu ba Formasaun Empregu, Sekretáriu Estadu ba Terras no Propriedade, Sekretáriu Estadu Kooperativa, Sekretáriu Estadu Juventude no Desportu no Sekretáriu Estadu Arte no Kultura.

Tuir planu, Prezidente Repúblika sei vizita munisípiu 12 no Rejiaun Administrativu Espesiál Ambeno-Oé-Cusse (RAEOA) atu kontinua haree besik dezenvolvimentu sosiál, ekonómika no polítiku iha nível baze no rona hanoin sira husi komunidade.

Prezidente Repúblika, durante ne’e halo ona vizita traballu iha Munisípiu Viqueque, Covalima, Lautémm no Ermera.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here