Sekretáriu Estadu ba Protesaun Sivíl, Joaquim José Gusmão dos Reis Martins. Imajen TATOLI/Egas Cristovão

DILI, 14 dezembru 2020 (TATOLI)Sekretaria Estadu Protesaun Sivíl (SEPS) planeia ona iha tinan 2021 estabelese Sentru Integradu Protesaun Sivíl no Sokorru inklui estabelese númeru úniku atubele halo atendimentu públiku bainhira iha situasaun emerjénsia.

“Daudaun ne’e bombeiru, ambulánsia no Eletricidade de Timor-Leste (EDTL) iha númeru ketak ne’ebé bainhira ita presiza bele liga, maibé agora atu estabelese númeru úniku nune’e bainhira presiza entidade hirak ne’e bele liga de’it ba númeru ida no Sentru Integradu Prostesaun no Sokorru maka sei jere,” Sekretáriu Estadu Protesaun Sivíl, Joaquim José Gusmão dos Reis Martins, informa ba Agência TATOLI iha Orchid Room Timor Plaza, segunda ne’e.

Lei Protesaun Sivíl aprovadu no Prezidente Repúblika promulga ona, tanba ne’e SEPS iha planu ba kurtu prazu sei submete lei orgánika ba Konselllu Ministru hodi bele iha debate no aprova.

Notísia Relevante: PN Aprova Ona Proposta-Lei Protesaun Sívil

“Lei orgánika maka sei identifika serbisu hosi nasionál to’o munisípiu no bele implementa saida maka Lei Protesaun Sivíl mensiona,” nia akresenta.

Sekretáriu Estadu ne’e dehan, hafoin lei orgánika aprovadu maka bele estabelese sentru integradu, ne’ebé hanesan sentru informasaun atende akontesimentu hotu.

Alende ne’e SEPS mós sei prepara númeru úniku ba atendimentu públiku.

Maski nune’e, atu atinje planu hirak ne’e, nia rekoñese presiza serbisu maka’as atu implementa iha kurtu prazu.

“Tanba ne’e ita asegura lai lejizlasaun no regulamentu, hafoin tama faze tranzisaun hosi lei ne’e rasik inklui lei órganika,” nia esplika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here