Graduadu na’in-hitu hasai foto hamutuk Ministru Petróleu no Minerál, Víctor da Conceição no entidade relevante, iha seremónia graduasaun, iha Suai Room Timor Plaza, segunda (14/12). Imajen TATOLI/Florêncio Miranda Ximenes

DILI, 14 dezembru 2020 (TATOLI)–Empreza petrolífera Santos ne’ebé hanesan parseiru Governu Timor-Leste, liuliu Ministériu Petróleu no Minerál (MPM) fó ona graduasaun ba timor-oan na’in-hitu finaliza ona estájiu iha área mina no gás.

Graduasaun daruak ne’e, ho baze hosi programa pilotu hosi tinan 2014 to’o 2016, ne’ebé parte sira konkorda realiza tan programa daruak ho durasaun fulan-18. 

Jerente Nasionál Santos, José Lobato Gonçalves, hateten joven formandu komesa formasaun iha novembru 2018 iha faze daruak ba  programa formasaun abilidade fundamentál ida ho durasaun fulan-neen.

“Hodi Santos no ami-nia parseiru Bayu-Undan nia naran, ami hakarak kongratula graduadu sira ho entuziazmu no kompromisu ba programa formasaun ne’ebé konsidera susar,” Dirijente ne’e dehan liuhosi ninia diskursu iha ámbitu graduasaun iha Suai Room, Timor Plaza, Dili, segunda ne’e.

Jerente Nasionál Santos, José Lobato Gonçalves. Imajen TATOLI/Florêncio Miranda Ximenes

Graduadu sira maka hanesan Jenilde Maria dos Reis Madeira formasaun iha área departamentu Finansa, Pamela Freitas Raquel Urabno iha área esplorasaun, Deonísia Maria Almeida iha área departementu Informátika, Celestino Zequiel Da Costa Amaral iha área Enjeñeiria Telekomunilakasaun, Rulison Almeida de Jesus iha área supply Chain, Elígio Basualdo iha área supply Chain, Peregrinha Relia da Costa iha área maritíma.

Programa ne’e finansiadu hosi joint venture Bayu-Undan tuir eskema ida ho kustu rekuperável.

Nia dehan, empreza Santos haksolok serbisu hamutuk reprezentante sira hosi Governu liuliu MPM no Autoridade Nasionál Petróleu no Minerál (ANPM) hodi realiza admisaun daruak ba programa ne’e. 

Programa ne’e, tuir José Lobato hanesan  parseria ida entre Santos no Governu Timor-Leste, ne’ebé oferese oportunidade atu hetan esperiénsia téknika no prátika ne’ebé valioza iha indústria mina no gás. 

Atividade estájiu ne’e mós fó oportunidade ba graduadu sira atu asume pozisaun estájiu remuneradu ba fulan-12 ho Santos, ne’ebé bazeada iha Perth, Darwin no Dili. 

Durante períodu ne’e, estajiáriu sira sei hala’o projetu no tarefa hodi dezenvolve koñesimentu kona-ba indústria petrolífera no hakle’an liután esperiénsia tuir ida-idak ninia disiplina. 

Graduadu sira mós partisipa iha kursu formasaun adisionál lubuk ida hodi hasa’e kompeténsia lian Inglés no abilidade atu ko’alia iha públiku ho aprezentasaun regulár ba lideransa. 

“Estájiu ne’e oferese formasaun no esperiénsia prátika inestimável ba partisipante sira kona-ba ambiente sira iha tasi-klaran no mós iha eskritóriu, nune’e haboot liutan sira-nia koñesimentu kona-ba indústria minarai no gás. Tanba ne’e ha’u husu imi uza oportunidade ne’e ho di’ak,” José Lobato enkoraja graduadu.

Ministru Víctor agradese empreza Santos 

Iha biban hanesan, Ministru Petróleu no Minerál, Víctor da Conceição Soares, hato’o agradesementu no kongratula empreza Santos ne’ebé fó kapasitasaun ba timor-oan atubele kontiribui ba dezenvolvimentu iha área petrolíferu.

Ministru Petróleu no Minerál, Víctor da Conceição. Imaje TATOLI/Florêncio Miranda Ximenes

“Governu konsidera formasaun ne’e importante tebes tanba bele prepara rekursu umanu liuliu timor-oan atu kontribui ba prosesu dezenvolvimentu,” Ministru Víctor dehan.

Nune’e, Governu sei kontinua serbisu hamutuk ho empreza Santos atu forma joven sira iha área oin-oin atu foku ba dezenvolvimentu petrolíferu.

“Ha’u hatoo parabéns ba joven na’in-hitu ne’ebé konklui ona no bele kontribui ba dezenvolvimentu iha área petroliferu iha ita-nia rai,” nia espera.

Governu Timor-Leste rekoñese no apresia knaar ne’ebé mak parte interesada hotu halo ona, hahú ho ConocoPhillips iha momentu ne’ebá no agora daudaun Santos no ninia parseiru bele garante ezekusaun ho susesu ba programa ne’e iha Perth no hafoin muda mai Dili ne’ebé  la’o ho di’ak.

Ministru nota katak graduadu sira iha koñesimentu, abilidade no esperiénsia ne’ebé indústria petrolífera presiza, hanesan susesu ida signifikativu hodi prepara Timor-Leste nia forsa traballu ne’ebé kualilfikada no prontu atu kompete ba oportunidade empregu.

Nune’e Governu kontinua fó apoia polítika ba empreza australiana ne’e atubele kontinua kapasitasaun iha fururu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here