Komandante PNTL Munisípiu Dili, Superintendente Xefe, Henrique da Costa. Imajen Tatoli/Eugénio Pereira

DILI, 14 dezembru 2020 (TATOLI)-Ernesto dos Santos, tinan 34, negosiante ida ne’ebé mate iha Merkadu Taibessi, Dili, foin lalais ne’e, la’ós tanba problema boot no la’ós mós tanba ódiu vingansa, maibé tanba de’it matebian sama aqua mamuk ida mak tarutu hodi halo suspeitu sira hakfodak no hamriik mai baku lesuk to’o sona mate Ernesto iha fatin akontesimentu.

Notísia Relevante : Arguidu oho Ernesto tama prizaun preventiva

Iha kazu omisídiu agravadu ne’e, autoridade Polísia halo nia knar investigasaun no identifikasaun hodi ikus mai deskobre duni suspeitu sira no suspeitu prinsipál, oras ne’e, kumpre ona desizaun Tribunál Distritál Dili (TDD) nian iha prizaun preventiva Becora, Dili.

Komandante Polísia Munisípiu Dili, Superintendente Xefe, Henrique da Costa dehan, suspeitu joven ida ho inisiál LS ne’ebé oho mate Ernesto dos Santos, 34, área Merkadu Taibessi, Suku Lahane Osidentál, Dili, kumpre ona pena prizaun preventiva iha prizaun Becora, Dili.

Tribunál Distritál Dili hala’o ona primeiru julgamentu iha semana kotuk hodi hamonu sentensa ba krime ne’ebé suspeitu komete.

“Depois halo investigasaun ita buka tuir ikus mai hetan no kaptura kedas suspeitu ne’e aprezenta ba iha Ministériu Públiku no  kazu ne’e ninia prosesu hetan ona prizaun preventiva,”  Superintendente Xefe, Henrique da Costa, hateten, ohin, ba jornalista iha Komandu PNTL, Dili.

Nia dehan, hafoin suspeitu oho mate tiha vítima, suspeitu halai lakon, no parte PNTL halo investigasaun hodi hein mandadu detensaun hosi Ministériu Públiku iha loron 12 dezembru, foin halo kapturasaun ba suspeitu.

Kronolojia kazu oho ne’e akontese, tanba de’it matebian Ernesto dos Santos atu  ba foti moskiteiru hodi falun ninian modo, maibé tanba de’it sama aqua mamuk tarutu, ikus mai suspeitu sira lanu hodi halo asaun baku no lori tudik sona mate vítima.

Servisu Investigasaun Kriminál no ospitál Dili halo ona autópsia ba mate isin hodi entrega ba família hodi halo serimónia funar iha matebian nia moris fatin.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here