Motór komunidade nian ne'ebé ema "lori lakon", polísia hetan fali ona. Imajen/PNTL

DILI, 14 dezembru 2020 (TATOLI)-Komandu Polísia Munisípiu Dili servisu hamutuk ho Servisu Informasaun Polísia (SIP) no Servisu Investigasaun Kriminál (SIC) buka hetan ona komunidade nia motór sanulu (10) ne’ebé ema deskoñesidu “lori subar” iha área kapitál Dili.

Notísia Relevante : PNTL detein suspeitu na’in-tolu “lori subar” motór

Komandu Polísia Munisípiu Dili, Superintendente Xefe Henrique da Costa, deklara motór hirak ne’e polísia rekolla direita hosi suspeitu sira ne’ebé forma grupu hodi halo atividade “lori subar” komunidade nia motór iha komunidade sira-nia uma no fatin públiku sira.

PNTL detein mós suspeitu na’in tolu (3) no daudaun ne’e sira nia kazu aprezenta ona ba Tribunál Distritál Dili no suspeitu sira kumpre ona prizaun preventiva iha prizaun  Becora, Dili.

Motór hirak ne’e, parte polísia hetan durante halo operasaun konjunta iha área kapitál Dili ba Munisipiu Baucau no Manufahi nian.

“Durante semana kotuk to’o agora ita halo operasaun, ita kaptura suspeitu na’in-tolu (3), no ninia prosesu kontinuasaun hetan ona desizaun prizaun preventiva tanba asaun ne’ebé suspeitu sira halo kontra lei,” Superintendente Xefe Henrique da Costa, haktuir ba jornalista liuhosi konferénsia imprensa, ohin, iha Komandu PNTL Dili.

PNTL mós sei kontinua buka tuir nafatin suspeitu balun ne’ebé halai subar no motór balun ne’ebé sira “foti ba subar”.

PNTL konsidera suspeitu sira ne’e iha rede tanba sira halo atividade ho profisionál, no uza ekipamentu modern hodi sobu motór.

Parte PNTL mós koopera ho Komandu PNTL Baucau, Manufahi hodi buka tuir motór balun ne’ebé suspeitu sira “foti subar” hodi lori ba munisipiu rua nSICe’e.

Motór 10 ne’e Komandu PNTL Dili asegura ona iha Caicoli, Dili, hodi hein komunidade sira ne’ebé sente motór lakon bele ba hato’o keixa hodi halo identifikasaun ba sira-nia motór ho dokumentu kompletu.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here