DILI, 14 dezembru 2020 (TATOLI)-Prokuradoria Jerál Repúblika (PGR) liuhosi Gabinete Kombate Korrupsaun no Krime Organizadu kontinua halo investigasaun ba dokumentu falsifikasaun veteranu.
Notísia Relevante : MACLN identifika tan dokumentu veteranu falsu 3000-resin
Prokuradór Jerál Repúblika José Ximenes, fó ona orientasaun ba Gabinete Kombate Korrupsaun no Krime Organizadu, hodi halo advokasia ba kazu sira hotu ba falsifikasaun dokumentu veteranu iha nivel nasionál.
PGR mós halo posivel esforsu koordena ho ho Ministériu Asuntu Kombatente Libertasaun Nasionál (MACLN) atu haree asuntu ne’e sériu.
“Presiza tau atensaun liu-liu lei kona-ba kombatente libertasaun iha artigu balun dehan ema ne’ebé deklara ka falsifika dokumentu lakon ninia direitu,” PGR José Ximenes, hateten, ohin, ba jornalista iha Palásiu Prezidensiál, Dili.
Iha novembru, tinan-ne’e, PGR José Ximenes, halo ona vizita lubuk ba iha munisípiu hodi observa prosesu balun sai preokupante, liu-liu falsifikasaun dokumentu pesoál veteranu sira-nian.
“Novembru, tinan-ne’e, MP akuza ema na’in-hitu iha Munisípiu Bobonaro ne’ebé falsifika dadus pesoál hodi inventa,” José Ximenes, lia tun hodi afirma tan, ba problema ne’e sai asuntu siriu no aprezenta ba Tribunál loke julgamentu tanba deskonfia falsifika dokumentu veteranu simu pensaun hosi Estadu.
Notísia Relevante : Lista veteranu falsu na’in-500-resin ba ona Ministériu Públiku
Jornalista : Nelson de Sousa
Editór : Francisco Simões
