Ekipa RHTO halo enkontru ho MInisteriu Saude.Imajen/Felicidade Ximenes.

DILI,14 dezembru 2020 (TATOLI)—Ministériu Saúde  (MS) hala’o enkontru ho Organizasaun Nasionál ba Ema ho Difisiensia, Raes Hadomi Timor Oan (RHTO) hodi trasa planu ba serbisu hamutuk durante tinan 2021 to’o 2023.

Enkontru, iha segunda ne’e atu hametin liután relasaun serbisu entre parte rua ba iha tinan tolu hahú hosi 2021 too 2023, bazeia ba nota entendimentu ne’ebé antes ne’e parte rua asina ona.

Notísia Relevante :Programa Prioridade RHTO iha Área Tolu

”Ami asina ona nota entedimentu iha semana kotuk, maibé ohin ami enkontru hodi hametin serbisu ne’e ho diak liután,” Ministra Saúde, Odete Maria Freitas Belo hateten ba jornalista sira iha Palásiu da Sinzas Caicoli, Segunda (14/12).

Antes akordu ne’e asina iha semana kotuk, Ministra Saúde informa iha atividade balun ne’ebé hala’o ona hanesan fó kapasitasaun ba maluk defisiente sira no mós fó kapasitasaun ba pesoál saúde sira atu atende maluk difisiénsia sira bainhira sira moras.

Governante ne’e hatutan, iha serbisu hamutuk ne’e mós ministériu hakarak atu lori maluk defisiénsia sira oinsá bele asesu ba iha edifísiu  públiku, ba iha eskritóriu bazeia ba planu estratéjiku ne’ebé dehan labele husik ema ida iha kotuk.

Iha fatin hanesan Diretór RHTO Organizsaaun Nasionál Ema ho Difisiénsia, Joãozito dos Santos, hateten  enkontru ne’e ko’alia liu kona-ba relasaun serbisu entre parte rua iha tinan tolu nian liliu ba iha saúde inkluziva nune’e bele halo tratamentu saúde hanesan ba ema ho kondisaun defisiénsia fiziku.

“Ida ne’e mak  objetivu husi nota entendiementu, no antes ne’e hala’o ona atividade balun hanesan formasaun ba pesoál  saúde kona-ba saúde inkluziva, serbisu hamutuk ho Institutu Nasionál Saúde tanba projetu pilotu ne’e hala’o ona  iha munisípiu Dili, Ermera no Baucau,” Joãozito dos Santos hateten.

Entretantu, ema ho difisiensia ne’ebé rejistu iha Raes Hadomi Timor Oan (RHTO) hamutuk 2.000 resin dezde tinan 2012 to’o 2020.

Notísia Relevante :RHTO Husu Governu Ratifika Konvensaun Direitu Ema Ho Defisiénsia

Jornalista:Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here