COVID-19

DILI, 14 dezembru 2020 (TATOLI)—Ministériu Saúde liuhosi Pilár II, segunda ne’e halo avaliasaun ba implementasaun programa promosaun saúde liga ba risku komunikasaun ho involvimentu komunidade ba prevene pandemia globál COVID-19.

Xefe Departamentu Promosaun Edukasaun Saúde, Misliza Vital, hateten lia hirak ne’e ba jornalista sira iha salaun Institutu Nasionál Saúde (INS) Comoro, Segunda (14/12).

“Tanba ne’e mak liu husi pilár II Ministériu Saúde hakarak halo avaliasaun fila-fali ba implementasaun risku komunikasaun no mós involvimentu komunidade, haree ba dezafiu no susesu atu bele hadi’a iha futuru,” Misliza Vitál  hateten.

Departamentu ne’e nia serbisu la’ós ba haree de’it ba COVID-19, maibé haree mós serbisu rutina  promosaun  edukasaun saúde nian no nia objetivu atu revee fila-fali implementasaun pilár II nian ba COVID-19 no mós haree ba serbisu rutina promosaun saúde hahú iha nível sentru saúde to’o iha  komunidade.

”Tanba ne’e mak iha komunikasaun ne’e ita hadi’a no reforsa iha buat hotu, maibé problema ne’ebé iha mak hanesan mudansa hahalok ne’ebé sai dezafiu boot ida ba ita,  tanba ne’e mak ita koko hotu maneira oinsá muda sira nia-an,” Xefe departementu ne’e esplika.

Pilár II  liga ba iha sub komisaun, iha evaluasaun no monitorizasaun hodi halo atividade rua mak hanesan rapid asesment no evaluasaun ne’ebé haree kona-ba konsiénsia komunidade kona-ba utilizasaun ekipamentu prevensaun COVID-19 ho rezultadu hatudu diak, maioria 99% ba leten komunidade hotu hatene informasaun kona-ba  prevensaun.

Rezultadu avaliasaun ne’e deskobre katak, husi serbisu sira ne’e nia susesu, mak  oras ne’e daudaun COVID-19 la iha trasmisaun lokál ba komunidade.

“Entaun ida ne’e susesu ida  koko atu halo buat hotu diak, no Minsitériu Saúde la serbisu mesak maibé parseria ho ministériu relevante ne’ebé mak kontribui ba sevisu pilar II nian,” nia subliña.

Jornalista: Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here