Diretór Kompañia Morizone Unipesoál Lda, Tito Belo, simu sertifikadu apresiasaun hosi Governu liuhosi Centro Nacional Chega (CNC) iha inaugurasaun Memoriál 7 Dezembru 1975’ iha Ponte Kias, Dili. Imjane/Mídia PR.

DILI, 14 dezembru 2020 (TATOLI)—Kompañia ida finaliza konstrusaun monumentu ida lori tempu naruk ho kualidade, sai tiha ona buat baibain. Maibé, kompañia ida mak májika konstrusaun memoriál ida lori durasaun tempu loron 20 nia laran de’it ho kualidade, ah, ida-ne’e mak sai estraordinária.

Konstrusaun “Memoriál 7 Dezembru 1975” iha Ponte Kais Dili. Imajen/Facebook: Tito Tivia Litia Abena.

Situasaun ida-ne’e mak akontese no hatudu hosi Kompañia Morizone Unipesoál Lda, ne’ebé lidera hosi timoroan foinsa’e ida ne’ebé iha kompromisu halo buat di’ak ba nia rai doben Timor-Leste. Bainhira Governu liuhosi Centro Nacional Chega (CNC) fó fiar ba ninia kompañia atu konstrui “Memorial 7 Dezembru 1975” iha Ponti Kais, Dili, nia brani foti risku hodi simu pedidu ne’e ho responsabilidade.

“Prosesu tenderizasaun ba administrasaun ne’e limitadu tebes. Entaun, Centro Nacional Chega (CNC) ba ko’alia ho Ajénsia Dezenvolvimentu Nasionál (ADN) depois empreza lima ne’e konkorre konkursu ba obra ne’e. Maibé, empreza lima ne’e labele hala’o konstrusaun ne’e no hiit liman tanba difísil iha senáriu (gambar),  depois tempu mak natón. Empreza lima ne’e reseiu ka hakiduk tanba ho razaun dehan tempu mak limitadu liu. Entaun, CNC bolu direta ha’u-nia empreza Morizone Unipesoál Lda, hodi halo konstrui “Memoriál 7 Dezembru 1975 ne’e,” Diretór Kompañia Morizone Unipesoál Lda, Tito Belo, hato’o ba Agência TATOLI iha Kafé Uut, Faról, Dili, sesta ne’e.

Tito Belo ladún hatene kona-ba prosesu tenderizasaun ba konstrusaun “Memoriál 7 Dezembru 1975” ne’e, maibé Governu liuhosi Centro Nacional Chega (CNC) bolu nia kompañia bainhira laiha ona rezultadu ba kompañia lima (5) ne’ebé tuir konkursu ne’e, entaun ikus mai Governu bolu fali nia atu konstrui memoriál refere.

Diretór Kompañia Marizone Unipesoál Lda, Tito Belo, hateten atu halo konstrusaun ba “Memoriál 7 Dezembru 1975” ne’e, nia grau difikuldade mak iha “arte”. Tanba, “arte” ne’e la’ós iha nia mármeru de’it maibé iha nia estrutura tomak.

“Ita haree obra kiik oan hela maibé ninia tingkat kesulitan mak arte ne’e. Entaun, empreza sira seluk hiit liman tanba ita la’ós haree mármeru maibé haree hotu ba estrutura beton hotu. Iha akontesimentu 7 dezembru 1975 ne’e, militár Indonézia tiru ema mate barak iha Ponti Kais Dili. Entaun, atu halo arte tuir ida-ne’e mós susar uitoan. Tanba ne’e mak presiza duni ema-ne’ebé mak servisu iha arte nian ka ema ne’ebé iha esperiénsia ba arte mak bele halo tuir, tiru mate ema ne’e nia figura ne’e oinsá,” nia haktuir.

Só, bainhira Governu liuhosi Centro Nacional Chega (CNC) bolu fali nia empreza Morizone Unipesoál Lda, nu’udar timoroan nia simu pedidu ne’e no hakarak kontribui ba dezenvolvimentu nasional. Liuliu atu konstrui “memoriál” ida atu memorializa saudozu sira-nia luta hasoru invazór rezime Soeharto invade Timor-Leste liuliu akontesimentu 7 Dezembru 1975 iha Ponte Kais, Dili.

Imajen/Media CNC.

Nia ko’alia onestu katak “Memoriál 7 Dezembru 1975” ne’e bele dehan obra kiik maibé risku boot. Tanba, tuir nia, arte ne’e la’ós fasil no presiza tempu naruk mak bele halo konstrusaun ramata. Maibé, ho kompromisu boot, Empreza Morizone Unipesoál Lda, simu pedidu ne’e no hahú konstrui “Memoriál 7 Dezembru 1975” ne’e hosi 16 Novembru 2020 no finaliza ka entrega ba Centro Nacional Chega (CNC) iha 5 dezembru 2020.

Kona-ba materiál konstrusaun, Tito Belo hatán, materiál ba konstrusaun ne’e hameno ka lori hosi Surabaya-Indonézia. Ema arte-na’in ida-ne’ebé halo eskultura ba mármeru ho nia naruk metro-2,50 no ninia luan metru-5 ne’e mak naran NURKOLIS hosi Kompañia BINTANG ANTIK SEJAHTERA (BAS) iha Surabya.

“Baibain ne’e eskultura (ukir) mármeru ne’ebé lais liu ne’e, kleur liu mak bele lori durasaun to’o iha fulan tolu mak ramata. Maske pandemia COVID-19, maibé ami tenta ho esforsu tomak hodi ko’alia ho ema ne’ebé mak halo eskultura no ikus mai iha loron haat nia-laran, sira konsege eskultura hotu depois haruka mai loron rua nia-laran (pengiriman) to’o iha Timor-Leste,” nia dehan.

Maske loron ne’ebé limitadu maibé Empreza Morizone Unipesoál Lda, sempre prontu iha kualker tempu saída de’it. Tanba ne’e mak obras “Memorial 7 Dezembru 1975” ne’e, Kompañia Morizone konsege entrega ba Centro Nacional Chega (CNC) iha 5 dezembru 2020 ho responsabilidade no ho kualidade mós.

Imajen/Media CNC.

“Kona-ba dezeñu ‘Memoriál 7 Dezembru 1975’, konsultan CNC nian mak prepara no ami-nia empreza mak haree de’it ba obra ne’e. Obra ne’e, ami ezekuta ho tempu badak maibé ami garante ninia kualidade ba tempu naruk nian. No, iha ami-nia kontratu retensaun ne’e to’o fulan ne’e. Bainhira buat ruma ami sei responsabilza. Maibé, ami garante tebes katak sei dura kleur. Obra ‘Memoriál 7 Dezembru 1975’ ne’e, gasta osan hamutuk rihun $21,” Tito Belo dehan.

Nu’udar timoroan ne’ebé iha fuan ba Timor-Leste, la’ós tanba tempu limitadu ne’ebé naran halo de’it maibé Empreza Morizone sempre uza matéria espesífika mak konstrui obra “Memoriál 7 Dezembru 1975” ne’e. Tanba, tuir informa, antes ne’e empreza ne’e mós halo konstrusaun ba Jardin 5 de Maiu, Colmera, Dili, ho durasaun tempu finaliza ne’e fulan ida semana rua. Nune’e mós, ninia empreza mós konstrui Jardin Lifau Oé-Cusse maibé seidauk bele finaliza obra Lifau to’o ohin loron tanba kahur ho polítika uitoan.

Governu fó sertifikadu apresiasaun ba empreza Morizone

Imajen/Media CNC.

Tanba haree konstrusaun “Memoriál 7 Dezembru 1976” ne’ebé konstrui hosi empreza Morizone Unipesoál Lda, ne’e ho kualidade di’ak, entaun Governu Timor-Leste liuhosi Centro Nacional Chega (CNC) fó sertifikadu apresiasaun sertifikadu Diretór Kompañia Morizone Unipesoál Lda, Tito Belo, iha inaugurasaun “Memoriál 7 Dezembru 1975” iha Ponte Kias, Dili, iha loron memória nian, segunda (7 dezembru 2020).

“Ami kontente tebes tanba ami-nia parte mós halo dezenvolvimentu ba kontrusaun ‘Memoriál 7 Dezembru 1975’ nian. Entaun, ho sertifikadu ne’ebé Estadu fó ba ami ne’e tanba haree ba ami-nia servisu ne’ebé mak ho durasaun semana tolu [loron 20] nia-laran de’it maibé ami konsege ezekuta tuir saida mak Governu hakarak no haruka,” nia hateten.

Tuir nia, durasaun konstrusaun ba “Memoriál 7 Dezembru 1975’ ne’e limitadu tebes maibé empreza refere ho esforsu tomak hodi finaliza tuir CNC nia pedidu rasik. Ho ne’e, empreza hakarak agradese tanba Governu rekonese hodi fó apresiasaun liuhosi sertifikadu ida.

Tanba ne’e, Diretór Kompañia Morizone Unipesoál Lda, Tito Belo, apela ba Governu Timor-Leste atu fó opurtunidade ba emprezáriu timoroan atu kompete iha konkursu públiku ba obra Governu sira-nian la’ós fó fiar de’it ba empreza internasionál ka estranjeiru.

“Ha’u hanesan emprezáriu timoroan husu ba Governu Timor-Leste katak bele mós fó fiar ba ami empreza timoroan sira tanba ami fiar katak ami mós bele. Labele fó fiar liu ba empreza internasionál ka estranjeiru sira-nian atu kaer obra Governu nian de’it maibé fó opurtunidade mós ba empreza timoroan sira-nian atu koko no hatudu rezultadu ho kualidade ba públiku. Ami mós nunka hakarak atu lakon fiar hosi ami-nia Estadu no Guvernu Timor-Leste ne’e. Ami nafatin prontu no hakarak kontribui ba dezenvolvimentu Timor-Leste nian iha futuru,” nia hateten.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here