Jerente Mercy Corps no Prezidente IPG, akompaña hosi Sekretáriu Estadu Protesaun Sivíl, Joaquim Gusmão, asina akordu iha Orchid Room Timor Plaza, segunda (14/12). Imajen TATOLI/Natalino Costa

DILI, 14 Dezembru 2020 (TATOLI)Institutu Petróleu no Jeolojia (IPG, sigla portugés) hamutuk Ho Mercy Corps selebra akordu hodi apoia institutu halo estudu ba redusaun risku dezastre naturál.

Prezidente IPG, Gabriel Gaspar Aparício de Oliveira, konsidera institutu nu’udar instituisaun ne’ebé durante ne’e halo peskiza iha área rekursu  jeolojia no rekursu naturál.

“Tanba ne’e akordu ohin atu haree oinsá maka ita halo estudu ba dezatre naturál ba rai halai, tsunami  no mós ba dezastre jeolojia sira ne’e IPG maka halo. Entaun ba oin ami koopera ho Mercy Corps hodi partilla rezultadu peskiza risku jeolójiku ba ita-nia sosiadade hodi kontribui ba informasaun, nune’e sosiadade bele informadu ho di’ak no bele hatene didi’ak halo prevensaun hadook-an hosi risku,” Prezidente IPG dehan ba Agência TATOLI, iha Orchid Room Timor Plaza, segunda ne’e.

Iha fatin hanesan, Senior Koordenadór Risku Urbanu hosi Mercy Corps, Hermenegildo Cardoso Lenti, hateten selebrasaun akordu hosi parte rua ho objetivu atu fó apoiu malu halo estudu identifikasaun iha área risku ba dezastre.

“IPG maka halo estudu ba risku dezastre no jeolojia, tanba ne’e liuhosi akordu ita hamutuk presiza halo estudu no mapamentu, nune’e halo indentifikasaun di’ak karik bainhira dezastre naturál mosu iha área risku karik ita bele hatene ona hodi aviza ba komunidade bele ses ona hosi fatin risku,” nia informa.

Nia dehan, parte Mercy Corp desponível apoia tan fasilidade ba institutu hanesan drone, aparellu scaming, nune’e IPG bele halo estudu di’ak liután.

Nune’e mós, Sekretáriu Estadu Protesaun Sivíl, Joaquim Gusmão, hateten prezensa Sekretaria Estadu ne’e atu hatudu Governu ninia apoiu ba kestaun risku dezastre naturál.

“Atu kombate dezastre naturál la’ós Sekretaria Estadu Protesaun Sivíl nia responsablidade de’it, maibé ita hotu ninia responsablidade, tanba ne’e Governu nia prezensa ohin iha ne’e hodi haree apoiu ba estudu ne’ebé IPG halo,” dehan governante ne’e.

Enkuantu, iha ambitu selebrasaun akordu ne’e IPG mós fahe relatóriu peskiza ne’ebé sira halo ba ba instituisaun sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here