Padre Parókia Sagrado Coracação de Jesus, Becora, Dioseze Dili, Amu Domingos da Silva “Maubere” . Imajen Tatoli/António Gonçalves

DILI, 14 dezembru 2020 (TATOLI)—Reprezentante Igreja no Pároku Sagrado Coração de Jesus Becora, Domingos Maubere, hateten igreja la’os halo polítika maibé hanorin sarani sira atu la’o tuir dalan ne’ebé loos tanba polítika nu’udar servisu ida-ne’ebé mai kedas hosi Maromak bainhira kria ema.

“Ami (igreja) la’os halo polítika maibé ami hanorin sarani sira atu la’o tuir dalan-loos. Ami-nia servisu mak hanorin. Igreja tenke hala’o knaar ida-ne’e tanba ita-nia knaar ne’ebé halo polítika nian, mai kedas hosi Maromak bainhira Nia kria ita. Tanba, Maromak halo ita tuir Nia illas no lalatak atu ukun no ukun ne’e mak dada malu fila-fali ba Maromak. Ita rasik buka fali ba Maromák tanba ita ema mai hosi Maromak no sei fila-fali ba Maromak,” Padre Domingos Maubere hateten Ajénsia TATOLI hafoin sai oradór ba Semináriu Nasionál ho tema “Tinan 24 Prémiu Nobel da Paz no Kompromisiu Timor-Leste atu Harii Estadu Direitu Demokrátiku ne’ebé Respeitu Konstituisaun no Direitu Umanu” iha salaun Katedral, Vila Verde, Dili, segunda ne’e.

Tanba ne’e, Padre Domingos Maubere husu ba sarani sira atu servisu makaas ba direitu umanu no kumpre didi’ak Maromak Nia ukun fuan 10 ne’ebé mak santa igreja hanorin.

Nia hatutan, igreja ko’alia kona-ba polítiku tanba igreja-nia papél no knaar maka oinsá hanorin ema sai ema ho nia direitu tomak ne’ebé tenke kaer metin ba iha Maromak-nia ukun fuan 10.

“Ha’u esplika igreja nia papél no knaar mak oinsá hanorin ema sai ema ho nia direitu tomak. Tanba ne’e, ita kaer metin ba iha Maromak nia ukun fuan 10, tanba ukun fuan ne’e Maromak prepara tiha ona mai ita atu defende direitu umanu liuliu ita-nia direitu nu’udar ema,” nia esplika.

Bainhira sarani sira kumpre didi’ak ona direitu nu’udar sarani nian, nia dehan, tuir loloos Maromak nia ukun fuan 10 ne’e mós servisu no implementa ona ba direitu umanu.

Padre Domingos esplika, iha deklarasaun universál direitu umanu foka ba aspetu barak maibé ninia baze mak Maromak Nia ukun fuan 10 ne’e.

“Ko’alia kona-ba universál labele dada-liu ba igreja ninian. Maibé haree ida ne’ebé mak relevante liu, entaun sira aponta ida-ne’e tau iha direitu umanu. Maibé ninia baze mak ukun fuan 10 ne’e. Tanba ne’e, ita sarani iha obrigatóriu partisipa halo polítika hanorin sarani la’o tuir dalan-loos tuir Jesus hanorin,” nia esplika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here