Eis Prezidenti da Republika, Ramos Horta.Imajen/Antonio Goncalves

DILI, 14 dezembru 2020 (TATOLI)—Laureadu Prémiu Nobel da Paz, José Manuel Ramos Horta, hateten rezultadu luta la’ós ema ida rua mak lidera maibé ema barak ne’ebé lidera hanesan iha rai-laran mak hosi Francisco Xavier do Amaral, Nicolau Lobato, no Xanana Gusmão mak sai ulun no klamar ba luta ba ukun rasik aan nian.

“Sira na’in tolu (Lobato, Xavier no Xanana) ne’e mak hanesan ita-bele hateten ulun no klamar luta nian,” Laureadu Prémiu Nobel da Paz, José Manuel Ramos Horta, hateten ba jornalista sira, bainhira sai oradór ba semináriu nasional ho tema “Tinan 24 Prémiu Nobel da Paz no Kompromisiu Timor-Leste atu Harii Estadu Direitu Demokrátiku ne’ebé Respeitu Konstituisaun no Direitu Umanu”  iha salaun Katedral, Vila Verde, Dili, segunda ne’e.

Ramos Horta hatutan, maske Francisco Xavier do Amaral no Nicolau Lobato mate ona, maibé bele dehan sira na’in tolu ne’e úniku. Maibé mós, nia dehan, iha erói sira seluk sei moris hanesan Taur Matan Ruak, Lere Anan Timur, Falur Rate Laek, no veteranu sira no mós papél klandestina no juventude nian, liuliu papél igreja nian hotu ne’ebé mak luta haleu hosi povu tomak no instituisaun hotu-hotu hodi liberta povu no rai Tomor-Leste.

Kona-ba Prémiu Nobel da Paz ne’e, Eis Prezidente haktuir tan katak, labele hanoin mak Prémiu Nobel da Paz ne’e maibé hanoin oinsá mak atu halo balansu ba independénsia Timor-Leste.

Ha’u hakarak temi, liu-liu la’os atu hanoin fali Prémiu Nobel da Paz. Maibé agora no ba oin ita hanoin katak, rai ida-ne’e iha ne’ebé no atu ba ne’ebé. Di’ak ka lae balansu besik tinan 20 independénsia ona. Tanba ne’e mak relasiona ho semináriu nasionál ne’e, ha’u atu halo balansu ba rai ida-ne’e, tanba ha’u rona politíku balun no akadémiku internasionál balun ne’ebé halo krítiku negativu kona-ba Timor Leste. Ha’u hateten iha tinan 1975, buat ida ita bolu esperansa no espetativa vida, bainhira timoroan nia moris no nia hahoris ho idade hira. Ida-ne’e mak ita bolu esperansa vida nian,” Ramos Horta hateten.

Nia dehan, Timor-Leste nia espetativa vida iha tempu independénsia Timor-Leste aumenta espetativa vida aumenta tinan 12 maibé ema akadémiku balun dehan Timor-Leste hakiduk ba kotuk, entaun ema hirak ne’e hatene hosi ne’ebé.

“Iha espetativa vida, boot hanesan Kambodia no Myanmar. Ita-nia rai di’ak liu ho rai sira hotu iha Áfrika nian. Tanba ne’e mak ha’u ladún konkorda ho hanoin hirak ne’e. Favór ita tenke otimista no rekoñese uitoan ba ita-nia rain rasik. Esforsu ne’ebé Governu halo dezde 2016-2020 hodi ita tenke kontinua melloria,” Ramos Horta dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here