Prezidente Komisaun C (Finansa Públika), Deputada Maria Angélica Rangel. Imajen/Egas Cristovao.

DILI, 14 dezembru 2020 (TATOLI)—Governu sei justifika ezekusaun Orsamentu Jerál Estadu (KJE) 2020 nian liuhosi aprezentasaun Konta Jerál Estadu (KJE) iha tinan oin (2021).

Prezidente Komisaun C (Finansa Públika), Deputada Maria Angélica Rangel, nota katakGovernu laiha problema ho ezekusaun orsamentu 2020 nian tanba hahú hosi janeiru to’o dezembru ezekuta rejime duodesimál Dotasaun Temporáriu Orsamentál (DOT).

“Naturalemente tuir lei orsamentu tinan ida-ne’e akaba, ami sei bolu Governu aprezenta sira-nia ezekusaun liuhosi konta jerál Estadu iha tinan oin,” Deputada Maria Angéica Rangel ba jornalista sira iha resintu Parlamentu Nasionál, segunda ne’e.

Prezidente Komisaun C ne’e fó-sai katak, ezekusaun orsamentu 2020  nian to’o dezembru nia klaran liu ona 60%.

Tuir Rejimentu Parlamentu Nasionál (RPN) artigu 176 (Aprezentasaun Konta Jerál Estadu nian) ne’e hala’o hafoin Tribunál Superiór Administrativu, Fiskál no Kontas aprezenta paresér ba Parlamentu Nasionál iha fulan sanulu nia laran hafoin tinan ekonómiku ne’ebé refere to’o nia rohan.

Maske Rejimentu uza “tinan fiskal” no “tinan ekonómiku”, naran loos mak “tinan finanseiru”, tuir Lei n.º 13/2009, loron 21 fulan outubru, kona-ba Orsamentu no Jestun Finanseira.

Iha aprezentasaun konta jerál estadu ne’e sei diskute bazea mós ba RPN artigu 177, 178, 179  no artigu 180.

Tuir portál transferénsia Ministériu Finansa nian ne’ebé Ajénsia TATOLI, asesu ohin governu ezekuta $940,569,974.90 (69.2%) hosi montante orsamentu  orsamentu $1,497,042,620.00, saldo hela $274,077,121.32.

Parlamentu Nasionál aprova OJE 2020 iha loron  08 outubru 2020 liubá ho rezultadu votasaun a-favór 43, kontra 21 no abstensaun ida (1).

Despeza ba tinan fiskál 2020 biliaun $1.497,1, ne’ebé prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.

Totál despeza ba Orsamentu Jerál Estadu 2020 biliaun $1,497.1 (la inklui atividade ne’ebé finánsia hosi doadór sira ho valór millaun $184.0,  liu  1.0%  kompara  ho  orsamentu 2019 nian.

Timor‐Leste iha rejime duodesimál (DOT) durante tinan 2020 nia laran tanba orsamentu la aprova tuir kalendáriu regulár ne’ebé iha. Limite de’it ba 1/12 hosi orsamentu orijinál tinan kotuk maka bele fahe kada fulan. Ida-ne’e signifika funsaun esensiál Governu nian bele kontinua maibé polítika balun ne’ebé fora hosi atividade anuál labele implementa, inklui  projetu infrastrutura importante balun.

Montante orsamentu biliaun $1.497,1 foti hosi fundu petrolíferu millaun $963,9 kompostu hosi Rendimentu Sustentável Estimadu (RSE) millaun $544,4 no transferénsia superiór RSE millaun $419,5.

Entretantu reseita naun-petrolífera millaun $770.6 komposta hosi reseita tributária millaun $165,0, reseita propria millaun $6,8, doasaun millaun $10,7, jurus millaun $0,5, saldo jerénsia millaun $527,6 no empréstimu millaun $60,0.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here