Semináriu Nasionál ho tema "Tinan 24 Prémiu Nobel da Paz no Kompromisiu Timor-Leste atu Harii Estadu Direitu Demokrátiku ne'ebé Respeitu Konstituisaun no Direitu Umanu" . Imajen TATOLI/Osória Marques.

DILI,14 dezembru 2020 (TATOLI)–Asosiasaun Kombatente Brigada Negro (ACBN-sigla portugés) mobiliza no sensibiliza istória Prémiu Nobel da Paz ba juventude sira tanba sira mak sai nu’udar lideransa futuru nian.

Sekretáriu Jerál ACBN, Rui Lourenço da Costa, heteten katak ACBN komesa preokupa ho situasaun TL nian ne’ebé mak ita-nia governante sira balu intensionalmente tan de’it podér hakarak viola konstituisaun.

“ACBN hahú prekupa ho situasaun Timor-Leste nian ne’ebé mak ita-nia governante sira balu intensionalmente tan de’it podér hakarak viola konstituisaun, la respeitu prinsípiu separasaun podér. Entaun, ita hahú halo mobiliza sensibiliza joven sira ho istória atu sira mós bele prepara sira-nia aan, aprofunda sira-nia koñesementu hodi informa mós ba sosiedade tomak, atu nune’e bele hatene loloos saida mak atu akontese tanba sira maka futuru lideransa,” Sekretáriu Jerál ACBN, Rui Lourenço da Costa, heteten ba jornalista sira iha Salaun Katedral, Dili, segunda ne’e.

Nia hatutan, joven sira presiza hatene istória hodi fó hanoin ne’ebé maka pozitivu, preparadu atu nune’e bele hasoru situasaun ne’e ho atitude ne’ebé maka síviku no prudente.

“Ha’u husu ba joven sira keta haluha kuda vertude sira tanba igreja katólika kontribui ba própriu no ba iha atitude ida-ne’ebé maka di’ak, nune’e ita sai lideransa ne’ebé di’ak iha vertude, hakbiit sosiedade ida-ne’ebé prósimu moris iha fraternidade no solidaridade,” nia dehan. 

Entretantu, iha semináriu nasionál kona-ba komemorasaun tinan 24 ba Prémiu Novel da Paz maibé tau hotu Xanana nia retratu iha José Manuel Ramo-Horta no Don Carlos Filipe Ximenes Belo hetan Premiadu Novel da Paz ne’e nia klaran tanba lori Xanana nia kontribuisaun mak timoroan na’in-rua ne’e bele simu premiu refere.

“Ita tau hotu retratu Xanana nian, ida-ne’e tanba reformasaun ne’ebé Xanana halo hanesan uluk tanba ho lideransa Xanana nian mak TL nakloke no la’o hamutuk ho igreja ba luta ita-nia ukun aan,” nia haktuir.

Tanba, nia esplika, Xanana mak hamosu multipartidarizmu polítiku katak Timor-Leste sei la sai partidu úniku hanesan uluk iha revolusionáriu 1975 maibé bainhira Timor-Leste ukun-aan sei hamosu partidu barak atu nune’e garante demokrásia direitu umanu.

Maibé, nia dehan, Xanana mós halo transformasaun importante tebes ho separasaun forsa armada hosi partidu polítiku ida katak partidu polítiku ida labele sai na’in ba forsa armada maibé povu mak tenke sai na’in ba forsa armada ida-ne’e.

Nia hateten, importante tebes atu garante respeitu ba direitu umanu katak forsa armada sei la sai instrumentu ba operasaun hosi partidu polítiku ida ba ninia opozisaun sira.

“Ida-ne’e furak tebes tanba ho Maun Xanana mak kria kondisaun ida-ne’e no maun Ramos Horta hanesan figura ida-ne’ebé importante tebes atu simu servisu ne’ebé boot. Nune’e, igreja katólika liuhosi Don Carlos Filipe Ximenes Belo, hatete katak promove dame no vertude sira ne’ebé mak iha,” nia dehan. 

Nune’e, nia hateten lider na’in-rua ne’e nia lideransa ida-ne’ebé mak forte tebes hodi influénsia povu atu la’o ba luta demokratikamente hodi determina destinu final ba ukun-aan.

Semináriu nasionál ne’e realiza tanba ACBN servisu hamutuk ho Brigada Xanana no Movimentu Patriotizmu Defende KRDTL atu mobiliza no sensibiliza istória ne’e ba juventude TL.

Jornalista: Osória Marques

Editór: Cancio Ximenes

.

HAKEREK NO HATÁN

Please enter your comment!
Please enter your name here