Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 12 dezembru 2020 (TATOLI)-Parlamentu Nasionál (PN) halo ona aprovasaun ba Orsamentu Jerál Estadu (OJE) ba tinan fiskál 2020 iha finál globál ho votu a-favór 44, kontra 0, no abstensaun 0.

Primeiru-Ministru (PM), Taur Matan Ruak, hateten iha tinan-rua ho balun, Governu konsege halo orsamentu neen, tanba ne’e nia konsidera aprovasaun orsamentu ne’e bele loke siklu foun.

“Ho aprovasaun orsamentu, fiar katak bele ajuda taka siklu ida no ajuda loke siklu foun, tanba Governu ida iha mandatu halo orsamentu ida de’it, maibé ami iha metade mandatu halo ona orsamentu neen. Ha’u kontente loos tanba ho aprovasaun orsamentu ne’e bele loke siklu foun ida ne’ebé bele normaliza filafali ita-nia prefeitura orsamentu sira tinan-tinan,” Xefe Governu hateten hafoin votasaun finál flobál iha sala plenária PN, sábadu ne’e.

Notísia Relevante: PN aprova proposta OJE 2021 iha finál globál

PM nota katak, iha parte seluk bele fó kbi’it ba Governu atubele rekupera ekonomia hafoin efeitu COVID-19 akontese no afeta maka’as loos ba ekonomia no konsekuénsia sira hosi orsamentu doudesimál ne’ebé ita hala’o durante ne’e.

Governu sustenta mákina Estadu ho rejime duodesimál durante fulan-10 nia laran, hahú janeiru to’o outubru 2020.

“Hakarak lori VIII Governu Konstitusionál nia naran, agradese ba Parlamentu Nasionál no espesiál ba deputadu sira hotu tanba ho pasiénsia no dedikasaun tomak bele apoia aprova orsamentu 2021. Governu rejista preokupasaun hotu ne’ebé deputadu sira aprezenta durante diskusaun,” nia akresenta.

Xefi Ezekutivu promete preokupasaun reprezentante povu sira nu’udár referénsia no sei rejista hodi hariku proposta OJE 2022.

“Tempu ba tempu ita aprende ho esperiénsia no dezafíu sira ne’ebé iha inklui mellora nafatin no hadi’a ekonomia, maibé iha parte seluk bele garante sustentabilidade rekursu ne’ebé iha liuliu rekursu finanseira,” nia fó hanoin.

Governu promete sei halo esforsu atubele implementa orsamentu ho di’ak hodi atinje objetivu rekuperasaun ekonómika, fó empregu ba sidadaun no ajuda setór privadu bele iha kbi’it ajuda Governu halo dezenvolvimentu.

Biban ne’e, Xefe Governu mós deklara katak lamenta ho auzénsia bankada opozisaun Congresso Nacional Reconstrução Timorense (CNRT) ne’ebé deside la partisipa iha diskusaun OJE 2021 faze espesialidade no finál globál.

“Ha’u lamenta auzénsia partidu CNRT nian durante ne’e, iha polítika diferénsia iha, maibé labele sai satan hodi retira apoiu dezenvolvimentu nasaun maibé presiza halo desizasaun no Governu hakarak husu nafatin kontribuisaun ba dezenvolvimentu nasaun ho diferénsia saida de’it mak iha importante ita hotu hamutuk tu reuni forsa no kbi’it hodi dezenvolve ita-nia rai, iha momentu sira hanesan ne’e mak ita tenke hamutuk,” Taur subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here