Prezidente Assosiasaun Naroman tara tais ba SECoop, Elizario Feereira, binhira hala’o vizita ba Asosiasaun Naroman iha Suku Fahedebu, Postu Administrativu Bazartete, Munisipiu Liquiça. Imajen/Mídia SECoop.

LIQUIÇA, 12 dezembru 2020 (TATOLI)—Sekretariu Estadu Kooperativa (SECoop, sigla portugés), Elizario Ferreira, husu Asosiasaun Naroman nakfilak aan sai koooperativa nune’e bele iha sustentabilidade finanseira no kontribui hodi eleva sira-nia ekonómia sai di’ak liután.

“Ha’u husu ba iha grupu Asosiasaun Naroman atu nakfilak-aan sai kooperativa nune’e bele iha susutentabilidade finaseira. Nune’e, bele benefísia sira no ba populasaun mós oinsá eleva sira-nia ekonómia,” dehan Sekretariu Estadu Kooperativa, Elizario Ferreira, ba jornalista sira hafoin halo diálogu ho Asosiasaun Naroman iha suku Fahilebu, Postu Administrativu Bazartete, Munisipiu Liquiça, sábadu ne’e.

Elizario Ferreira hatutan, ba oin Sekretáriu Estadu Kooperativa sei esforsu hodi fó formasaun ba Asosiasaun Naroman nune’e bele sai hanesan kooperativa ida iha futuru.

“Sira-nia inisiativa ne’e di’ak. Sira presiza hetan atensaun oinsá sira sai  kooperativa hodi kria kondisaun atu bele dezenvolve di’ak liután sira-nia atividade ba  ita-nia populasaun. Ami sei fasilita formasaun ba sira hodi sai kooperativa ne’ebé bele sustentavél iha estabilidade finanseira iha sira-nia kooperativa rasik,” nia hateten.

Iha fatin hanesan, Prezidente Grupu Asosiasaun Naroman, Martinho dos Santos, hateten atividade ne’ebé mak Asosiasaun Naroman halo mak produsaun batar no fini ba batar.

Imajen/Mídia SECoop.

“Ami nia asosiasaun ne’e harii iha 2015. Durante ne’e ami produs batar no fini hodi faan ba kompañia. Osan sira-ne’ebé ami iha, ami rai hamutuk no fó impresta ba ami-nia membru sira no komunidade sira, nune’e sira hadia sira-nia moris. Ida ne’e mak ami halo iha suku ne’e,” Prezidente Grupu Asosiasaun Naroman, Martinho dos Santos hateten.

Nia hatutan, batar sira ne’ebé sira prodús bainhira faan karik sira tenke konsulta malu ho membru sira seluk iha asosiasaun ne’e. Tanba, nia haktuir, batar ne’ebé sira prodús ne’e, tinan ida bele atinji tonelada 20 no tinan ida ne’e sira iha tonelada 12 no faan kilo ida $1.50.

Nia dehan, osan ne’ebé maka Asosiasaun Naroman rai mak daudaun ne’e iha montante rihun $40 no osan ne’e rasik fó fali ba membru no komunidade sira iha suku laran impresta hodi sustenta sira-nia moris.

Entertantu, nia informa, membru definitivu ba Asosiasaun Naroman ne’e agora iha ema na’in-27 no agora daudaun sira halibur membru to’o ema na’in-150 ona.

Jornalista: Natalino Costa

Editór: Cancio Ximenes  

HAKEREK NO HATÁN

Please enter your comment!
Please enter your name here