Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 12 dezembru 2020 (TATOLI)Reprezentante povu iha Uma Fukun Parlamentu Nasionál (PN) espera aprovasaun proposta Orsamentu Jerál Estadu (OJE) 2021 ho montante biliaun $1,895 bele transforma ema ba sentru dezenvolvimentu.

Xefe bankada Frente Mudansa (FM), Isabel Freitas Ximenes, fó votu favorável hodi ejize nafatin responsabilidade Governu ba interese povu Timor-Leste.

“Orsamentu ne’e bele lori Timor-Leste sai nasaun ekonomikamente reziliénte no lori nasaun transforma ema ba sentru dezenvolvimentu. Husu nafatin Governu fó atensaun ba edukasaun ne’ebé di’ak ba povu, asesu ba eletrisidade, apoia saúde ba povu tomak, apoia setór privadu tantu negosiante informál no mikro sira, inklui investe nafatin iha eskola públika sira,” Deputada bankada opozisaun ne’e dehan liuhosi sala plenária hafoin aprovasaun proposta-lei OJE 2021 iha finál globál, sábadu ne’e.

Notísia Relevante: PN aprova proposta OJE 2021 iha finál globál

Deputada ne’e husu ba Governu atu halo ezekusaun di’ak ba programa rekuperasaun ekonómika ho rigorozu no kuidadu durante períodu tranzitóriu.

Sorin seluk, Deputadu bankada Partidu Libertasaun Populár (PLP), Noé da Silva ‘Buka Tuir’ konsidera orsamentu ne’e di’ak ba povu tomak.

Deputadu Bankada Governu ne’e husu Governu atu buka tuir timor-oan ne’ebé sei lakon durante prosesu funu naruk no ruin seidauk hetan to’o ohin loron.

Iha sorin seluk, Xefe bankada Partidu Unidade Dezenvolvimentu Demokrátiku (PUDD), António de Sá Benevides, argumenta laiha razaun vota kontra orsamentu Estadu.

Reprezentante Bankada Kmanek Haburas Unidade Nasionál Timor-oan (KHUNTO), Deputadu Luís Roberto da Silva, fó votu favorável ba orsamentu 2021 tanba atu hatán ba nesesidade povu.

“Hakarak fó hanoin ba membru Governu tomak katak orsamentu ne’ebé aprova ona bele ezekuta ho di’ak nune’e bele hadi’a nasaun,” nia hateten.

Nune’e mós, Deputadu Bankada Partidu Demokrátiku (PD), Mariano Assanami Sabino, maski fó votu favorável, maibé nia parte nota katak orsamentu ne’ebé bele haforsa reziliénsia ekonomia no soberania alimentár, aloka ba agrikultura 1,7% de’it.

“PD nafatin promove debate konstrutivu no nafatin fó apoia karik iha orsamentu retifikativu ne’ebé sei mosu mai,” nia akresenta.

Xefe Bankada Frente Revolusionária Timor-Leste Independente (FRETILIN), Francisco Miranda Branco, dehan aprovasaun orsamentu ho 44 votu a-favór tanba proposta-lei ne’e prienxe regra Konstitusionál, legál no rejimentál.

“Orsamentu ne’e raan ba nasaun no fó moris ba povu, FRETILIN nia postura polítika iha Uma Fukun sempre firme atu defende interese povu tomak, tantu iha opozisaun ka Governu, preokupasaun sosiu-ekonómika iha Timor-Leste mak determina ami-nia postura polítika, ne’ebé sempre buka dalan hotu atu kontribui ho onestidade, frontalidade ho objetivu fundamentál atu hetan solusaun ba nasaun no povu ,” Deputadu Bankada Governu ne’e subliña.

Entretantu, Xefe bankada Uniaun Demokrátiku Timorense (UDT), Francisco Xavier David Carlos, apresia vontade bankada Governu no opozisaun sira hotu durante diskusaun orsamentu.

“Ita deskute dezde debate jeneralidade, espesialidade no ohin ita aprova ona iha finál globál, tanba ne’e Timór tenke bá-oin,” deklarasaun polítika hosi Bankda UDT.

Jornalista: Evaristo Soares Martins

Editora: Julia Chatarina

HAKEREK NO HATÁN

Please enter your comment!
Please enter your name here