Prezidente Parlamentu Nasionál, Aniceto Longuinhos Guterres Lopes. Imajen TATOLI/Egas Cristovão

DILI, 12 dezembru 2020 (TATOLI)Prezidente Parlamentu Nasionál (PPN), Aniceto Longuinhos Guterres Lopes, husu Governu atu ezekuta Orsamentu Jerál Estadu (OJE) 2021 ho integridade morál, koordenasaun institusionál no profisionál.

Deputadu bankada Frente Revolusionária Timor-Leste Independente (FRETILIN) ne’e konsidera OJE nu’udar instrumentu fundamentál ne’ebé determinante atu fó solusaun ba problema sira-ne’ebé Estadu no sidadaun sira hasoru, hodi kontinua sustenta vida sosiál, polítika, bo ekonómika nasaun nian.

“Aspeitu hirak ne’e ezije integridade morál, koordenasaun institusionál no profisionalizmu atu konstitui no fundamenta Orsamentu Jerál Estadu. Tanba ne’e husu servidór Estadu hotu ne’ebé hola parte iha unidade órganika, atu halo jestaun no utilizasaun orsamentu tenke iha bagajen (naha) ida-ne’e,” dehan PPN hafoin aprova proposta-lei orsamentu 2021 iha finál globál, iha sala plenária Parlamentu Nasionál (PN), sábadu ne’e.

Notísia Relevante: PN aprova proposta OJE 2021 iha finál globál

Ho hanoin hirak ne’e maka nia konsidera OJE hanesan raan moris agora no ba futuru.

Deputadu bankada Governu ne’e subliña, Governu sai ezekutór prinsipál ba orsamentu Estadu, enkuantu PN hala’o funsaun hanesan fiskalizadór.

PPN nota katak, OJE presiza instrumentu orgániku hodi dinamiza no atualiza jestaun no utilizasaun hodi atinje meta no objetivu estratéjiku dezenvolvimentu nasionál.

Deputadu ne’e realsa, tuir perspetiva polítika, ekonómika, legál no téknika ne’ebé forma karater OJE, kolokasaun orsamentu ba tinan fiskál 2021 iha dimensaun transversál, tanba ne’e ezije órgaun soberania hotu ninia partisipasaun inklui sidadaun iha prosesu ezekusaun.

Jornalista: Evaristo Soares Martins

Editora: Julia Chatarina

HAKEREK NO HATÁN

Please enter your comment!
Please enter your name here