Orkestra São Pedro anima públiku iha Jardín 05 de Maio, Faról, sábadu (12/12). Imajen TATOLI/Nelia Fernandes

DILI, 12 dezembru 2020 (TATOLI)—Eskola Múzika São Pedro lori estudante mai públiku atu hatudu espresaun muzikál ne’ebé durante ne’e sira aprende, tanba ne’e liuhosi orkestra realiza konsertu múzika hodi anima sidade Dili.

“Objetivu prinsipál maka atu anima sidade Dili iha lorokraik ne’e bainhira ema mai iha jardín, bele haksolok rona múzika. Ami toka múzika Natál balun atu partilla katak Natál iha ona ita-nia oin no ita presiza prepara-an atu simu Maromak kosok-oan,” Diretór Eskola Múzika São Pedro, Padre Adérito Manuel Euclides Vitor da Costa, dehan ba ba Agência TATOLI, sábadu ne’e, iha Jardín 05 de Maio.

Nia hatutan, atividade muzikál durante oras rua ne’e atu prodús foin sa’e sira sai artista telentu ne’ebé bele anima ema.

“Atividade ohin ami bolu espresaun muzikál, labarik sira bele aprende violiñu ne’ebé durante tinan tomak ami seidauk halo konsertu ida ba sira. Entaun atu taka tinan letivu ne’e, maka ami hakarak lori sira mai públiku tamba durante ne’e sira sulan no toka de’it iha sira-nia fatin, entaun ema la haree sira. Nune’e lori sira sai mai li’ur atu hatudu ba públiku,” Diretór Eskola Múzika São Pedro akresenta.

Atividade múzika ne’e hanaran ‘eskola múzika lorosa’e’, ne’ebé integra ba Eskola São Pedro.

“Ami hala’o atividade ne’e, inan-aman sira selu no fó empeñamentu ba oan sira atu aprende múzika, entaun sira tenke aprezenta iha públiku atu hatudu katak sira aprende buat ruma durante tinan tomak nia laran,” nia hatutan.

Atividade orkestra São Pedro kolabora mós ho drum band hosi Institutu Superiór Cristál (ISC) no Annur.

Drum band hosi Institutu Superiór Cristal no Annur kolabora ho Orkestra São Pedro harame atividade espresaun muzikál iha Jardín 05 de Maio, Faról, sábadu (12/12). Imajen TATOLI/Nelia Fernandes

“Ami sente presiza halo barullu oituan. Ba estudante piano, sira mai hosi váriu eskola hanesan Ensinu Básiko Canossa, Hati Kudus Sacrojes Becora, Eskola Internasionál, Marcelo 2 inklui São Pedro,” Diretór ne’e informa.

Nia konsidera, múzika ohin hatudu variadade ne’ebé durante ne’e estudante sira aprende, drum band kombina ho orkestra violiñu, volare, tebe-tebe, ina lou no pop.

Diretór ne’e dehan, estudante sira aprende piano durante fulan-lima no sira mós hatene ona nota ruma, tanba ne’e eskola múzika deside lori sira sai mai li’ur.

“Durante ne’e ami treinu estudante sira, ba ensaiu no balu ba tuir aula hanesan ami fó teoria, prátika, hafoin sira hili múzika ne’ebé tuir sira-nia hakarak atu toka,” nia subliña.

Jornalista: Nelia Fernandes

Editora: Julia Chatarina

HAKEREK NO HATÁN

Please enter your comment!
Please enter your name here