Magnífiku Reitór UNPAZ, Adolmando Soares Amaral. Imajen/UNPAZ

DILI, 12 dezembru 2020 (TATOLI)–Magnífiku Reitór Univercidade da Paz (UNPAZ), Adolmando Soares Amaral, apela ba estrutura iha universidade privadu ne’e, atu labele hariku-an durante mandatu tinan-haat.

Nia hato’o lia hirak ne’e iha ámbitu seremónia Judisium ba dala XIV, ba finalista Fakuldade Saúde Públika UNPAZ hamutuk 236, ho tema ’Haforsa Rekursu Umanu hodi Prevene COVID-19 ho nia Implikasaun iha Timor-Leste’.

Notísia Relevante: Reitór UNPAZ enkoraja finalista Saúde Públika 236 labele lakon morál

“Iha ami-nia mandatu, ha’u husu ba estrutura lalika hanoin katak iha tinan-haat atu hariku-an iha universidade ne’e, tanba se ita hakarak hanoin hariku-an fatin la’ós iha ne’e, karik iha fatin seluk maka bele transforma ita-nia estatutu hanesan emprezáriu nasionál maibé la’ós hanesan dosente ou asume kargu iha universidade,” Reitór ne’e dehan sábadu ne’e,  iha salaun UNPAZ, Manleuana.

To’o agora, UNPAZ gradua ona ema na’in-11.000 resin no hosi númeru ne’e, 78% maka asesu ona ba kampu traballu enkuantu 22% seluk kria rasik asosiasaun, atividade, no organizasaun.

Biban ne’e, Adolmando Soares husu ba Reitór, Pró-reitór, Dekanu no Vise-dekanu, atu asumi kargu ho responsabilidade. 

“Nune’e ita bele forma ita-nia kolega sira ho kualidade no kontribui ba Estadu no Governu atu redúz no rezolve problema nasaun,” nia subliña.

Jornalista: Nelia Fernandes

Editora: Julia Chatarina

HAKEREK NO HATÁN

Please enter your comment!
Please enter your name here