Imajen/Mídia União Europeia em Timor-Leste.

DILI, 12 dezembru 2020 (TATOLI)—Dili Photography Community (DPC), ohin, ofisialmente halo abertura ba espozisaun fotografia iha Fundasaun Oriente ne’ebé hahú hosi 12 dezembru 2020 to’o iha 01 fevereiru 2021 ne’ebé loke ba públiku atu bele vizita.

Prezidente DPC, Ze Calistro “Ali Baba Timor”, hateten objetivu hosi espozisaun ho tema “Esperansa II” ho sub tema “Saida mak Esperansa?” ne’e hanesan programa anuál no mós sai hanesan orientasaun ba membru foun sira-ne’ebé atu sai membru permanente ba iha Dili Photography Community nia laran.

Nia dehan, membru sira integra iha DPC ne’e mós tuir formasaun bazíka iha klase ho prátika no atividade sira seluk. Ba obra fotografia sira-ne’e, ekipa examinadór sei halo fila-fali selesaun ne’ebé pasa mak sei aprezenta iha espozisaun refere.

Prezidente DPC, Ze Calistro “Ali Baba Timor”. Imajen TATOLI/Nelson de Sousa.

“Foto cover ne’ebé aprezenta iha espozisaun ne’e iha kategoria oioin hanesan find up, human interest, surealizmu, landscape no seluk tan,” Prezidente Dili Photography Community, Ze Calistro “Ali Baba Timor” informa ba Agência Tatoli iha fatin espozisaun Fundasaun Oriente, Dili, sábadu ne’e.

Nia hatutan, Dili Photography Community (DPC) harii iha 2013 hosi timoroan sira ho objetivu atu hasa’e foinsa’e sira-nia koñesementu kona-ba fotografia no hametin amizade hanesan família ki’ik ida hodi esplora turizmu lokál no promove beleza Timor, kultura no halo kontrolu sosiál iha aspetu oioin.

Vizitante estranjeiru haree hela forografia iha espozisaun “”Saida Mak Esperansa?” ne’ebé Dili Phography Community realiza iha Fundasaun Oriente. Imajen/Mídia União Europeia em Timor-Leste.

DPC, tuir nia, nu’udar mahon ida-ne’ebé hodi halibur foinsa’e sira-ne’ebé iha paisaun ba fotografia hodi aprende di’ak liu iha área fotografia no DPC rasik daudaun ne’e iha ona totál membru ne’ebe ativu hamutuk ema na’in-30.

“DPC promove grupu no membru sira, oinsá bele aprende liután iha área fotografia hodi promove  área arte fotografia nian iha Timor-Leste,” Ze Calistro “Ali Baba Timor” hateten.

Ze Calistro dehan, ho atividade sira-ne’ebé iha hodi aumenta kuiñesementu membru foinsa’e sira  iha área fotografia ninian. Durante ne’e membru sira mós hetan kontaktu hosi organizasaun naun governamental (ONG), atividade embaxada sira, festa kazamentu no sira seluk hodi hasai retratu hodi halo dokumentasaun.

“Ida-ne’e pozitivu tebes. Liuhosi foto sira-ne’ebé membru ida-idak sira hasai hodi públika  no iha mós ema  bolu sira ba hasai retratu hodi selu sira depende ba negosiasaun presu.” nia dehan.

Tuir observasaun Agência Tatoli nian iha loron dahuluk, lansamentu espozisaun ne’e hetan partisipasaun másimu hosi vizitante estranjeiru hodi haree direta fotografia sira no balun konsege atu sosa fotografia inspirativu balu.

Durante Periodu naruk ezistensia DPC nia hamriik, nia dehan, antes ne’e konsege organiza espozisaun ba dahuluk iha 2019 ho objetivu buka halibur fundu hodi tulun veterana Madalena Bidau Soares “Kasian” hodi kompleta fasilidade ensinu pre-eskolár ne‘ebé harii hosi veterana Madalena ‘Kasian’ iha Liquiça.

Nia haktuir, DPC mós ba daudaun konsege estabelese GALLERY Dili Photography Community iha Fundasaun Falur Rate Laek no sempre hola Parte iha atividade voluntáriu sira-ne’ebé mak buka halibur fundu ne’ebé organiza hosi grupu komunidade seluk ho maneira oferese fotografia hodi halo mini espozisaun.

Nia dehan, ida-ne’e sai hanesan motivasaun ida hodi dudu membru DPC tomak atu kontinua esplora kuiñesementu ne’ebé durante aprende hamutuk iha DPC atu kreativu  liután.

Tinan ne’e, nia hateten, DPC realiza espozisaun “Esperansa II” ba daruak ho nia Sub Tema mak “SAIDA MAK ESPERANSA?” ho apoiu fundu hosi Fundasaun Oriente no komisaun Europeia ho parseiru sira selu hodi bele realiza eventu ne’e.

Membru Dili Photography Community. Imajen/Mídia União Europeia em Timor-Leste.

Nia hatutan, espozisaun Fotografia ne’e parte ida mós buka halibur fundu atu apoiu juventude sira-ne’ebé mak iha kreatividade ne’ebé bele inspira ema seluk maibé sira laiha oportunidade atu hetan tulun hosi ema seluk.

“Tamba ne’e mak DPC hanoin atu buka dalan hodi tulun sira ho maneira halo espozisaun ba daruak hosi fundu hosi rezuladu espozisaun ne’e rasik sei uza ba Atividade Akampamentu durante loron 5 iha illa Atauro,’’ nia informa.

Tuir planu, nia esplika, atividade sira-ne’ebe sei prenxe iha akampamentu mak hanesan hasa’e konsiénsia joven relasiona ho asuntu protesaun ambiente, workshop kona-ba prezervasaun bee-matan, workshop kona ba Permakultura, fasilita mós formasaun kona-ba uza kreatividade halo resiklajen.

Jornalista: Nelson de Sousa

Editór: Cancio Ximenes

HAKEREK NO HATÁN

Please enter your comment!
Please enter your name here