Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 12 dezembru 2020 (TATOLI)—Bankada Frente Revolusionária Timor-Leste Independente (FRETILIN) otimista orsamentu tuir programa sei marka diferensa iha ezekusaun orsamentál no sei hadi’a povu no Estadu nia moris.

“Bankada FRETILIN apela no enkoraja Primeiru-Ministru, Taur Matan Ruak, atu firme ho polítika boa governasaun no transparénsia. Ami fiar katak ho orsamentu tuir programa sei marka diferensa no sei hatudu rezultadu no mudansa di’ak ba povu no Estadu nia moris,” Xefe Bankada FRETILIN, Francisco Miranda Branco, hato’o deklarasaun polítika hafoin aprovasaun proposta-lei Orsamentu Jerál Estadu (OJE) 2021, iha sala plenária Parlamentu Nasionál (PN), sábadu ne’e.

Deputadu bankada Governu ne’e louva partidu ne’ebé hetan asentu iha Parlamentu ne’ebé fó votu favorável ho maioria kualifikada.

Bankada FRETILIN nota katak votu a-favór 44 ne’ebé deputadu sira fó tanba proposta-lei ne’e tuir regra, prienxe rekezitu Konstitusionál, legál no rejimentál.

“FRETILIN nia postura polítika iha Parlamentu Nasionál prova beibeik nu’udar forsa polítika ida, sempre firme defende interese povu tomak atu iha opozisaun ka iha Governu,” nia akresenta.

Deputadu ne’e konsidera, preokupasaun ho situasaun sósiu-ekonómiku iha Timor-Leste maka determina bankada FRETILIN nia postura polítika sempre buka dalan hotu atu kontribui, onestidade, frontalidade, ho objetivu fundamentál atu hetan solusaun ba problema ne’ebé povu no nasaun hasoru.

Biban hanesan, bankada FRETILIN louva no valoriza tebes sentidu responsabilidade VIII Governu Konstitusionál inklui louva mós bankada PLP, KHUNTO, PD, FM, PUDD ho UDT, ne’ebé partisipa ativamente iha momentu deside Estadu nia vida.

“Ami sente aprovasaun orsamentu ne’e nu’udar momentu krusiál no importante ba nasaun, tanba liu tiha tinan tolu resin Estadu sobrevive ho de’it rejime duodesimál,” nia fó hanoin.

Nia mós hameno, molok atu transforma diresaun ida ka harii tan empreza estatál, ajénsia ka institutu públiku ruma, presiza halo uluk avaliasaun no estudu ba kustu no benefísiu, lori duni retornu ba Estadu ka halo todan tan de’it despeza públika.

Bankada FRETILIN rekomenda ba VIII Governu Konstitusionál atu re-avalia tabela no uniformiza tetu salariál, ne’ebé valoriza ema tuir serbisu atu labele iha saláriu ruma boot liu fali saláriu Prezidente Repúblika.

Bankada Governu ne’e bolu mós atensaun ba Governu atu haree esperiénsia projetu parseria públiku privadu (PPP) iha nasaun balun, ne’ebé dalabarak Governu maka investe mesak ka boot liu maibé fó ba parseiru privadu jere no ikus fali lori prejuízu ba Estadu.

“Nesesáriu tebes atu Governu tetu didi’ak molok halo kompromisu foun ho parseria públiku privadu seluk,” Deputadu Branco fó hanoin.

Bankada FRETILIN husu VIII Governu presiza fortalese prosesu desentralizasaun ne’ebé iha munisípiu la’o ona, nune’e fazeadamente implementa podér lokál tuir artigu 72 Konstituisaun Repúblika no fó mos kbiit ba konsellu suku hodi implementa rasik dezenvolvimentu komunitáriu.

Jornalista: Evaristo Soares Martins

Editora: Julia Chatarina

HAKEREK NO HATÁN

Please enter your comment!
Please enter your name here