Konferénsia imprensa Bankada CNRT iha sala bankada Parlamentu Nasionál, sábadu (12/12). Imajen TATOLI/Evaristo Soares Martins

DILI, 12 dezembru 2020 (TATOLI)—Bankada parlamentár Congresso Nacional Reconstrução Timorense (CNRT) prefere millaun $14 atu finaliza Ró Haksolok sosa ró foun tanba kazu to’o ona iha Ministéu Púliku (MP).

Iha Orsamentu Jerál Estadu (OJE) 2021, Governu sentrál prevee millaun $127 ba Rejiaun Administrativa Espesiál Oé-cusse Ambeno (RAEOA) inklui millaun $14 hodi finaliza Ró Haksolok.

“Tuir loloos Governu aloka millaun $14 hodi halo akizisaun ba ró-ahi foun iha nasaun seluk, la’ós kontinua konstrusaun ba besi a’at ne’ebé sai ona objetu krime. Konspirasaun atu hamate justisa iha Timor-Leste ne’e maka sai razaun prinsipál ida ba Bankada CNRT atu evita-an partisipa iha debate Orsamentu Jerál Estadu 2021,” Deputada Bankada CNRT, Maria Fernanda Lay dehan liuhosi konferénsia imprensa, iha sala bankada CNRT, iha Parlamentu Nasionál (PN), sábadu ne’e.

Bankada CNRT lamenta no kondena maka’as bankada parlamentár sira ne’ebé aprova alokasaun adisionál millaun $14 ba atu selu ró-ahi Haksolok.

Notísia Relevante: PN aprova millaun $127 ba RAEOA inklui millaun $14 finaliza Ró Haksolok

Razaun prinsipál ba bankada opozisaun ne’e lamenta tanba konsidera ró-ahi tama ona intervensaun justisa.

Bankada CNRT nota katak Governu hatene prosesu hosi kompañia Atlantic Eagle ne’ebé daudaun bankarota ona no laiha kapitál atu kontinua konstrusaun ró-ahi Haksolok.

“Agora obriga-an aloka tan orsamentu ne’ebé laiha serteza katak bele finaliza konstrusaun. Aprovasaun adisionál millaun $14 ba ró-ahi Haksolok ne’e hatudu katak iha konspirasaun polítika,” nia akresenta.

Bankada opozisaun ne’e konsidera katak bankada parlamentár ne’ebé aprova alokasaun adisional millaun $14, kontra ona prinsípiu justisa, transparénsia, no akontabilidade.

Bankada ne’e klarifika katak konstrusaun ró atinje ona 90% ne’e la loos.

“Faktu ne’ebé loos maka, ró-ahi Haksolok ne’e ninia mákina mós seidauk iha no sei presiza tan ekipamentu balun atu bele konklui nia konstrusaun,” nia akresenta.

Deputada ne’e fundamenta, estaleiru Figueira da Foz ne’ebé hanesan fatin konstrusaun ró-ahi la’ós kompañia Atlantic Eagle nian maibé estaleiru ne’e Governu portugés.

“Ida-ne’e atu konklui konstrusaun tenke iha envolvimentu hosi Governu Portugál, ne’ebé RAEOA laiha autoridade atubele intervein iha Governu Portugál nia desizaun,” hateten deputada bankada opozisaun ne’e.

Jornalista: Evaristo Soares Martins

Editora: Julia Chatarina

HAKEREK NO HATÁN

Please enter your comment!
Please enter your name here