Logo Lao Hamutuk

Husi: La’o Hamutuk

Introdusaun

Tuir dokumentu planu rekuperasaun ekonómika, objetivu husi programa cesta bázika mak apoiu família sira hetan sira-nian nesesidade bázika hodi kontribui ba kombate hamlaha no vulnerabilidade, apoiu ba agrikultór, produtór no mós komersiante. Objetivu ne’e iha ligasaun forte ho problema inseguransa ai-han no má nutrisaun iha rai-laran ne’ebé aas. Problema inseguransa ai-han no má nutrisaun ne’e hetan influénsia husi fatór oi-oin ne’ebé presiza resposta. Programa cesta bázika mai ho aproximasaun intersetoriál hodi inklui setór agrikultura, saúde no komérsiu. Maibé seidauk klaru kona-ba saida mak problema seguransa ai-han nian ne’ebé programa cesta bázika sei responde iha kontestu Timor-Leste nian? Oinsá programa cesta bázika bele kontribui hodi responde ba inseguransa ai-han no má nutrisaun krónika? Oinsá aproximasaun di’ak liu ba oin? Pergunta hirak  ne’e sei diskute iha artigu ne’e.

Cesta bázika no seguransa ai-han iha Timor-Leste

Seguransa ai-han mak, situasaun ida ne’ebé eziste bainhira ema hotu, iha tempu hotu, iha asesu fíziku, sosiál no ekonomia ba ai-han ne’ebé sufisiente, seguru no iha nutrisaun ne’ebé koresponde ba sira nia nesesidade no preferénsia han nian atu hala’o moris ida ne’ebé ativu no saudável (FAO 2006). Seguransa ai-han nia pilar haat mak hanesan disponibilidade, asesu, utilizasaun, no estabilidade. Pilar disponibilidade refere ba fornesimentu ai-han ne’ebé bele akontese liuhusi produsaun, distribuisaun no interkámbiu. Asesu refere ba kapasidade atu hetan ai-han no mós alokasaun hahán ne’ebé liga ba ema nia preferénsia. Utilizasaun iha ligasaun ba metabolizmu ka oinsá ema nia isin prosesa ai-han. Ikus liu, pilar estabilidade refere ba abilidade atu hetan ai-han iha tempu hotu.

Liga ba pilar seguransa ai-han nian, programa cesta bázika responde ba pilar disponibilidade no asesu. Distribuisaun ai-han sei aumenta disponibilidade ai-han iha uma-kain sira no komunidade nia leet, no iha tempu hanesan hafasil ema nia asesu tanba fahe ho gratuita. Se programa ne’e motiva duni agrikultór sira atu hasa’e produsaun ai-han, nia sei kontribui mós ba hasa’e disponibilidade no asesu ba tempu naruk liu. Maibé tanba hala’o ba fulan rua de’it ho kuantidade ai-han ne’ebé uitoan, cesta bázika sei haforsa de’it disponibilidade no asesu iha tempu badak. Aproximasaun tempu badak hanesan ne’e baibain koresponde liu ba situasaun inseguransa ai-han tranzitóriu no sazonál (tuir époka), maibé la responde  ba inseguransa ai-han króniku.

Inseguransa ai-han tranzitóriu refere ba situasaun ne’ebé populasaun menus abilidade atu prodús ka sosa ai-han ba periodu ruma, tanba situasaun sira hanesan dezastre naturál, presu ai-han sae no lakon rendimentu. Inseguransa ai-han sira ne’ebé mosu tanba COVID-19 mos bele konsidera nu’udar inseguransa ai-han tranzitóriu. Inseguransa ai-han sazonál refere ba situasaun falta ai-han iha fulan balu durante époka produsaun agrikultura nian. Inseguransa ai-han sazonál iha Timor-Leste baibain akontese molok kolleta batar no hare (Figura 1). Intervensaun hodi responde ba inseguransa ai-han tranzitóriu no sazonál mak hanesan  distribuisaun pakote ai-han ba família sira ne’ebé afetadu ka vulneravel liu.

Figura 1. Tempu inseguransa ai-han sazonál akontese durante ‘lean period’ ka tempu entre kuda no kolleta, hahú husi Novembru too Fevereiru. (Gráfiku husi FAO Country Briefs ba Timor-Leste, 2 Setembru 2020)

Diferente ho tipu inseguransa ai-han rua iha leten, inseguransa ai-han króniku refere ba situasaun falta ai-han husi tempu ba tempu tanba produsaun ai-han ne’ebé la nato’on ba konsumu, laiha meius seluk atu asesu ai-han, no mós tanba kondisaun saúde ne’ebé halo ema nia isin labele utiliza hahán ho di’ak. Asaun hodi responde ba inseguransa ai-han króniku ne’e inklui hasa’e produsaun ai-han, diversifika uma kain sira nia rendimentu, no hadi’a asesu ba bee no saneamentu ne’ebé di’ak. Situasaun seguransa ai-han no má nutrisaun króniku mak problema boot ida iha Timor-Leste ne’ebé la’ós afeta de’it jerasaun agora maibé sei afeta mós ba kualidade jerasaun futuru. Relatóriu Integrated Food Security Phase Classification (IPC) husi Ministériu Agrikultura no Peska hatudu pursentu 36 husi populasaun Timor-Leste moris ho inseguransa ai-han króniku (MAP 2019).

Husi perspetiva seguransa ai-han nian, bele simu programa cesta bázika hanesan intervensaun tempu badak hodi responde ba situasaun inseguransa ai-han temporáriu sira. Programa ne’ebé bele responde ba inseguransa ai-han tranzitóriu ne’ebé mosu, tanba COVID-19 no inseguransa ai-han sazonál ne’ebé baibain akontese entre fulan-novembru no fevereiru. Durante periodu surtu COVID-19 ema barak lakon sira nia rendimentu ne’ebé importante ba sira atu asesu ba ai-han (OXFAM & MDI 2020; UNDP 2020). Intervensaun tempu badak ne’e mós sai importante liu, tanba produsaun agrikultura iha époka kotuk ladún di’ak, tanba hasoru problema klimátika, peste no moras animál. Iha époka kotuk udan been  tun la regulár kauza produsaun hare tun, peste Fall Army Worm (ulat tentara) estraga produsaun batar no moras fahi nian, African Swine Fever (ASF), oho fahi rihun barak iha munisípiu hotu (MAP 2020).

Kontribuisaun cesta bázika ba inseguransa ai-han & má nutrisaun krónika

Maski programa cesta bázika mai ho objetivu klaru katak ajuda povu hetan nesesidade imediatu sira iha tempu badak de’it, alokasaun orsamentu ne’ebé boot tebes tenke justifika ho impaktu tempu naruk husi programa ne’e. Programa cesta bázika hetan alokasaun  orsamentu millaun $71.5 hodi gasta iha fulan-novembru no dezembru de’it. Orsamentu ne’e  boot liu totál alokasaun Orsamentu Jerál Estadu ba Ministériu Agrikultura no Peska husi tinan 2016 to 2020 (Totál orsamentu ba MAP iha tinan 5 ne’e hamutuk millaun $68). Bainhira programa ho gastu boot hanesan ne’e laiha kontribuisaun ba rezolve problema boot nasaun nian hanesan inseguransa ai-han no má nutrisaun krónika, programa sei sai de’it hanesan programa emerjénsia baibain ne’ebé implementa husi ajénsia naun govermentál sira ho rekursu limitadu.

Infelizmente, ho sistema ida agora, programa cesta bázika sei la kontribui boot ba hadi’a inseguransa ai-han no má nutrisaun krónika ne’ebé sai problema inseguransa ai-han boot iha rai laran. Relatóriu IPC nian hatudu pursentu 36 populasaun sei moris ho inseguransa ai-han króniku (MAP 2019). Relatóriu Global Hunger Index 2020 haktuir Timor-Leste iha kondisaun nutrisaun ne’ebé aat (Welt Hunger Hilfe & Concern Worldwide 2020). Relatóriu kona ba seguransa ai-han durante tempu COVID mós hatudu katak uma kain sira nia inseguransa ai-han sai aat liu (MAP 2020). Timor-Leste Demographic Health Survey 2016 nian mós haktuir nivel má nutrisaun ne’ebé aas, liu-liu iha labarik idade menus husi lima (Dir. Jerál Estatístika, Min.  Saúde & IFC 2018). Situasaun sira iha leten presiza responde ho programa ne’ebé foka ba problema nia hun no alvu ba populasaun ne’ebé presiza duni.

Programa cesta báziku nian labele kontribui másimu ba hadi’a inseguransa ai-han no má nutrisaun króniku tanba:

  1. Prinsípiu universalidade programa cesta bázika nian hamenus impaktu ba hadi’a inseguransa ai-han króniku, tanba la konsentra ba populasaun ne’ebé vulneravel liu, ne’ebé moris hela ho inseguransa ai-han króniku.
  2. Prinsípiu universalidade mós signifika katak sei distribui mós hahán ba 25% populasaun ne’ebé laiha problema inseguransa ai-han no nutrisaun (MAP 2019). Peskiza Asesmentu Rápidu Seguransa Ai-han nian mós hatudu 34% uma-kain la hasoru problema inseguransa ai-han durante aplikasaun restrisaun sira COVID-19 nian (MAP 2020).
  3. Tempu implementasaun nian la motiva hasa’e produsaun tanba implementa iha tempu ne’ebé agrikultór sira foin hahú kuda. Bainhira sira kolleta sira nia batar, hare, koto, fore no produtu sira seluk programa ne’e remata ona.
  4. Maski ho eskalaun ne’ebé boot liu, programa cesta bázika duplika programa emerjénsia sira seluk ho karákter hanesan ne’ebé molok ne’e governu rasik, ajénsia internasionál, ONG sira, organizasaun relijioza, setór privadu, no ema indivíduu sira implementa tiha ona (Tabela 1).

Tabela 1. Lista intervensaun balu liga ba seguransa ai-han ne’ebé implementa ona iha 2020 ne’e, molok programa cesta bázika.

· Transferénsia osan $200 ba uma kain no rendimentu menus husi $500 (Peskiza TAF nian hatudu katak maioria uma kain ne’ebé simu osan dehan katak sira uza osan ne’e barak liu ba sosa ai-han).

· Subsídiu ba 60% husi traballadór nia saláriu.

· Importa foos 30,000 tons.

· Aloka Millaun $2.9 husi fundu COVID-19 ba Agrikultura hodi suporta produsaun agrikultura.

· Suporta Millaun $10 husi Governu Australia, inklui ba reziliensia komunidade nian no rekoperasaun ekonomia.

· Uniaun Europeia suporta Millaun $3.5, inklui Millaun $1.3 hodi suporta ba uma kain vulneravel iha munisípiu ualu.

· ADB no UNDP suporta sosa no fahe cesta ai-han lokál ba uma kain vulneravel 25,000 iha Oekusi, Kovalima, Bobonaru, Baukau no Dili.

· Suporta husi setór privadu no individual sira, inklui husi lider rezisténsia Xanana Gusmão ne’ebé kobre komunidade barak iha munisípiu sira

 

Konkluzaun

Husi perspetiva seguransa ai-han nian programa cesta bázika bele kontribui ba hadi’a disponibilidade no asesu ba ai-han ba tempu  badak. Maibé impaktu cesta bázika ba inseguransa ai-han no má nutrisaun króniku ladún boot tanba cesta bázika la konsentra ba populasaun ne’ebé vulneravel liu no hasoru inseguransa ai-han bebeik. Tempu implementasaun programa cesta bázika mós la apár ho tempu produsaun ai-han nian. Alein de ne’e, programa cesta bázika mós duplika ka repete tan programa sira ne’ebé governu, ajénsia internasionál, ONG, instituisaun relijiozu, setór privadu no indivíduu  barak implementa tiha ona. Programa cesta bázika sei fó benefísiu boot liu se Governu orienta programa ne’e ba populasaun ne’ebé presiza duni, tanba hasoru hela problema inseguransa ai-han temporáriu sira. Ida ne’e sei salva orsamentu barak ne’ebé bele aloka fali ba programa seluk ne’ebé sustentável liu hodi hatún problema inseguransa ai-han no má nutrisaun króniku ne’ebé kauza husi produsaun agrikultura ne’ebé kiik, asesu be merkadu ne’ebé difisil, rendimentu kiik, importasaun ai-han baratu-importadu-laiha nutrisaun ne’ebé aas no falta asesu ba bee moos no saneamentu ne’ebé adekuadu.

Referénsia

Dir. Jerál Estatístika, Min.  Saúde & IFC 2018. Timor-Leste – Demographic and Health Survey 2016. https://datacatalog.worldbank.org/

FAO 2006. Policy Brief: Food Security, Issue 2, June 2006.  http://www.fao.org/

FAO 2020. Country Briefs: Timor-Leste. http://www.fao.org/

Gov. TL. 2020. Plano de Recuperação Económica.. https://www.gpm.gov.tl/

MAP 2019. The First IPC Analysis Report on the Chronic Food Insecurity Situation in Timor-Leste. https://reliefweb.int/

MAP 2020. Timor-Leste – Rapid Food Security Assessment 2020. https://asia.oxfam.org/

MDI & OXFAM 2020. Report on the informal sector in Timor-Leste in the midst of COVID-19. https://asia.oxfam.org/

The Asia Foundation 2020. Timor-Leste Covid-19 Household Cash Transfer: Initial Socio-Economic Impacts and Effects on Gender Dynamics. https://covid19.gov.tl/

UNDP 2020. Socio-Economic Impact Assessment of COVID-19 in Timor-Leste. https://www.tl.undp.org

Welt Hunger Hilfe & Concern Worldwide 2020. Global Hunger Index. https://reliefweb.int/

HAKEREK NO HATÁN

Please enter your comment!
Please enter your name here