Komandante Polísia Militár Majór Abel da Costa “NIKI” ofisiálmente hasai atributu F-FDTL nian hosi Segundu Sarjentu Manuel João Baptista. Imajen Tatoli/Egas Cristovão.

DILI, 11 dezembru 2020 (TATOLI)- Membru FALINTIL-Forsa Defeza Timor-Leste (F-FDTL), Unidade Polísia Militár (PM), Segundu Sarjentu Manuel João Baptista Aparicio, ohin, ofisiálmente rezigna-aan hosi F-FDTL.

Segundu Sarjentu Manuel João Baptista Aparicio rezigna-aan hosi F-FDTL. Imajen Tatoli/Egas Cristovão

Segundu Sarjentu Manuel João Baptista Aparicio, aprezenta ninia karta rezignasaun formal ba Xefe Estadu Maiór Jenerál F-FDTL, Majór Jenerál Lere Anan Timor ho Komandante Polísia Militár, Majór Abel da Costa “NIKI” no ninia prosesu rezignasaun ne’e  hala’o liuhosi serimónia parade militár iha Komandu Polísia Militár, Quintal Boot, Dili.

Manuel João Baptista Aparicio deklara, nia rasik hato’o inisiativa hodi rezigna-aan hosi Unidade Polísia Militár hodi envolve iha partidu polítiku ne’ebé nia asume knar nu’udar  vise prezidente partidu OS VERDES.

“Ha’u serbí FALINTIL komesa iha funu nia laran to’o transferénsia FALINTIL ba F-FDTL no sai nu’udar membru fundadór F-FDTL hamutuk ho FALINTIL no membru maluk veteranu barak fó ona kontribuisaun ba F-FDTL no agora tempu ona ha’u rasik hakarak sai hosi Instituisaun F-FDTL hodi fó fali kontribuisaun ba partidu polítiku OS VERNDES ne’ebé ha’u nia pozisaun nu’udar vise prezidente,” hateten Manuel João Baptista Aparicio ba jornalista.

Segundu Sarjentu Manuel João  Baptista, dehan, mezmu nia rezigna-aan, maibé nia parte prontu fó nafatin kontribuisaun ba Komandu F-FDTL bainhira presiza ninia kontribuisaun iha kuakér tempu hodi defende soberania Estadu no povu.

“Ha’u husu rezigna-aan hosi F-FDTL, maibé ha’u prontu nafatin kualkér tempu bainhira komandu presiza ha’u nia forsa no espíritu nu’udar militár,” nia tenik.

Segundu Sarjentu Manuel João  Baptista hahú tama iha Unidade Polísia Militár hamutuk ho ninia komandante F-FDTL no gerrilleiru FALINTIL balun iha tinan 2017 to’o nia termina nia knaar.

Durante ne’e, Manuel João Baptista partisipa ativu kampaña polítika Partidu OS VERDE iha Dili no ba munisípiu sira.

João nu’udar oan mane hosi Saudozu Adjuntu Komandante FALINTIL, “Sai La Fila” ne’ebé fó ninia kontribuisaun ba prosesu luta Timor-Leste nian iha luta armada to’o Timor-Leste restaura nia independénsia loloos iha 20 maiu 2002.

Iha fatin hanesan, Komandante Polísia Militár Majór Abel da Costa “NIKI” hato’o agradese ba inisiativa nia soldadu deside rezigna-aan hodi tama ba partidu polítiku.

“Ami nia membru ne’e la’ós ami mak hasai, maibé nia rasik maka halo rekerimentu hodi sai ba vida sivíl ne’ebé aprezenta ba Xefe Estadu Maiór F-FDTL, Majór Jenerál Lere Anan Timor, hodi deside ami nia membru ne’e ba vida sivíl la’ós tanba nia kontra Estadu no nasaun,” Majór Niki esklarese.

Majór Niki hatutan, durante ne’e Komandu Polísia Militár observa Segundu Sarjentu Manuel João  Baptista, nia envolvimentu iha atividade partidu nian, tanba ne’e komandu bolu membru ne’e hodi husu ninia paradeiru, ikus mai, membru ne’e deklara aberta to’o hatama karta rezignasaun.

Komandante Polísia Militár ne’e agradese, Segundu Sarjentu Manuel João Baptista nu’udar membru FALINTIL ne’ebé fó ona ninia kontribuisaun boot ba prosesu luta FALINTIL nian to’o independénsia.

Majór Niki hatutan, nu’udar komandante, nia lakohi nia membru ne’e atu sai, maibé tanba membru ne’e maka deside, nia tenke respeita desizaun ne’e.

Daudaun ne’e membru Polísia Militár ativu hamutuk na’in-158, nune’e ho rezignasaun  Segundu Sarjentu Manuel João Baptista, maka membru efetivu Polísia Militár nian hela na’in-157.

Jornalista   : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here