Imajen TATOLI/Rafy Belo.

“Uza imi-nia matenek ne’ebé mak ami (manorin-na’in sira) fó ho kompetente atu serbi ema ne’ebé presiza imi-nia tulun. Loos duni katak saúde iha ita hotu nia liman. Maibé, imi hotu ne’ebé hola parte hodi serbi iha saúde mak sei sai salvadór ba vida umana iha minutu ida ikus liu”

DILI, 11 dezembru 2020 (TATOLI)—Fraze badak ne’e nu’udar lia-menon “murak” hosi Dekanu Fakuldade Medisina no Siénsia Saúde (FMCS, sigla portugés), José Dionísio, nu’udar mós manorin-na’in ida ba Estudante Finalista FMCS na’in-95 iha Salaun Delta Nova, Dili, kinta (11 dezembru 2020).

Imajen TATOLI/Rafy Belo.

Iha salaun laran. Hosi liman loos no karuk. Iha parte lorosa’e, iha banner mutin be hakerek iha nia lolon liafuan sira “Serimónia Judisium no Juramentu Profisionál: Juramentu Profisionál nu’udar baze hodi responsabiliza no fiel ho komitmentu hodi fó asisténsia”. Iha manorin-na’in sira FMCS nian tuur hamutuk filleira ida hateke ba oin (parte loromonu), hateke hasoru inan-aman, família no maun-alin, alin-maun husi Estudante Finalista Eskola Superiór Medisina Jerál na’in-36 no Eskola Superiór Parteira, na’in-59.

Iha palku ida halo hosi ai be hamriik-metin, Manorin-na’in FMCS ne’e hato’o liafuan furak hodi enkoraja no kongratula inan-aman no nia estudante sira, tan dedikasaun no esforsu ne’ebé sira halo ona durante jornada akadémika. Impresionante.

Hakmatek. Situasaun hakmatek. Estudante finalista sira, tuur iha ida-idak nia fatin; Medisina jerál tau kazaku mutin no tara tensímetru iha kakorok, nu’udar futuru profisionál ida. Parteira sira mós tau kazaku mutin no Sangul iha ulun ho kesi selendan hakerek ho naran kumpletu no títulu akadémiku (Lic.Parteira) ka Lisensitura Parteira ho kór matak (nurak), hakerek ho letra kinur, kór osan-mean.

Imajen TATOLI/Rafy Belo.

“Partikularmente, Eskola Superiór rua ne’e hotu-hotu preparadu atu hatán ezijénsia profisaun nian hodi trata ema moras sira ho dignidade, respeitu no atensaun,” José Dionísio, nu’udar dekanu no manorin-na’in FMCS ne’e garante. Lensa no ahi-oan kámara nian, husi kintu-kantu lakan be lakan. Lensa sira-ne’e kaptura memória lubun. Grava istória. Istória inan-aman. Família. Finalista sira basa liman, simu ho ksolok.

Tuirmai, Reitór Universidade Nacional Timor Lorosa’e (UNTL), Francisco Miguel Martins konsidera, to’o iha serimónia Judisium no Juramentu Profesionál, ba estudante finalista sira la’ós “ain-le’ut” ka prosesu ida fásil. “Parabéns ba imi-nia esforsu. La’ós fásil maibé imi bele manan. Parabéns inan-aman, parente. Prosesu ida difisil tebes ba Medisina Jerál atu sai Médiku no Parteira,” nia dehan.

Iha fatin hanesan, Akadémiku UNTL ne’e reafirma tan hanoin Akadémiku José Dionísio nian katak: “Sira (Médiku no Parteira) mak sei konjugadu ba vida umana. Últimu tempu mak salva vida populasaun nian. Imi-nia responsabilidade”. Ho afirmasaun ne’e, inan-aman, família no finalista sira, dala ida tan basa-liman ho orgullu. Jornalista sira grava no foka, lalatak no liafuan idaidak ne’ebé temi husi manorin-na’in UNTL ne’e.

Salaun Delta Nova, “enfeita” ka orna ho Euforia, entre orgullu no esperansa. Iha ne’e, inan-aman, família, estudante finalista sira no mós manorin-na’in sira fó-sasin. Basa-liman.

Ezersitu “Bata Blanca”

Iha ámbitu serimónia Judisium no Juramentu Profisionál, Estudante finalista sira mós la tuur nonok. La hein de’it momentu simu “Títulu akadémiku” no “Juramentu”. Tanba ne’e, sira liuhusi sira-nia reprezentante hato’o mós hanoin. Obrigadu. Agredese. Deskulpa.

Imajen TATOLI/Rafy Belo.

Reprezentante Estudante finalista sira, Nivia de Pina Sarmento Seran, ho neon-susar, iha inan-aman, família no konvidadu sira-nia oin, iha palku leten, lee sai, nune’e: “Étapa ida ohin nu’udar pasu pozitivu ida ba ami-nia preparasaun atu simu kna’ar profisionál nu’udar Médiku no Parteira”.

“Obrigadu tanba prepara ona ami atu hakat daudaun hanesan ezersitu bata mutin ka iha lian española dehan Ejército de la blata blanca,” Nivia agredese.

Oras nafatin la’o. Segundu ba minutu. Minutu ba oras. Tuirmai, Nivia de Pina Sarmento Seran, hodi nia kolega sira-nia naran halo kompromisu ida katak sei: “Uza kompeténsia ho integridade hodi kontribui ba dezenvolvimentu país (Timor-Leste) liuliu iha setór saúde nian”.

Kompromisu ne’ebé refleta ba “valór” juramentu profisionál, ne’ebé sira halo, katak: 

Solenemente, ho prezensa Maromak nian iha Asembleia ida-ne’e, jura, hodi dedika ha’u-nia vida profisionál iha servisu umanidade nian, respeita dignifika no direitu umana. 

Sei ezerse kna’ar (Parteira no Médiku/a) ho konsiénsia no fidelidade, sei rai segredu ne’ebé iha, respeita ser umanu dezde konsepsaun to’o depois mate: la prátika aktu ne’ebé koloka ba risku integridade fízika ka psíkisa nu’udar umanu. 

Sei hala’o hamutuk ho ekipa saúde hodi alkansa melloria nível vida populasaun nian, manten nafatin ideál profisaun sira nian, obedese ba preseitu (hanorin) étika nian, legalidade, morál no mós nia onra no tradisaun sira.

Iha lidun seluk, molok to’o iha esénsia eventu akadémiku no profisionál: Judisium no Juramentu, iha inísiu ida-ne’ebé impresionante (terharu). Iha dadeer, bainhira loromatan nia roman sei mihis iha foho Fatuahi nia sorin bá, iha parte lorosa’e hamnasa mihis hodi simu hasoru. Anin huu maus. Rai sei malirin.

Maizmenus tuku 10 liu, serimónia hahú. Entre, inu Nasionál Pátria, Pátria no kansaun ofisiál UNTL nian, Hei, Oan Timor Lorosa’e, hahú ho múzika “Hei Oan Doben Sira” (Kompozitór: Mario Miguel) nia lian semo aas.

Hei oan doben sira

Respeita inan-aman bá

Tanba sira mak

Fó moris ne’e ba ó…

 

Hei oan doben sira

Hamta’uk inan-aman bá

Tanba sira mak haki’ak ó to’o boot…

 

La iha oan ida, selu inan-aman nia kolen;

La iha oan ida, selu inan-aman favór;

Hanesan tasi luan, lahlehan aas bá

Inan-aman nia kolen, sura labele

Inan-aman nia kolen, tetu labele

Inan-aman nia kolen, Maromak mak selu.

Imajen TATOLI/Rafy Belo.

Knananuk ne’e mak sai múzika eskollida entrada ba Estudante finalista na’in-95. Iha odamatan parte lorosa’e, estudante finalista na’in 36 (mane 17, feto 19) husi Eskola Superiór Medisina Jerál. Iha odamatan parte loromonu nian, estudante Parteira 59 hamriik ho tensu (tegang) no hakat tama neineik ba sala laran, Delta Nova nian.

Melódia múzika “Hei oan doben sira…” lian ho delikadeza. Ema hotu (inan-aman, família, manorin-na’in no konvidadu sira hotu) be hamriik iha salaun laran ne’e hamriik ho nonook. Iha ema barak nia leet, observa hetan inan feton ida, hamriik iha filleira daruak parte sul, fatin ba família nian, hatais faru metan hanesan ema lutu hela, matan-been nakonu. Hanesan jornalista, ha’u hateke inan feton ne’e, espontaneamente ha’u mós neon-susar. Matan-been turuk bokon mós iha ha’u-nia matan sikun. Hakarak “subar” ha’u-nia neon-susar, maibé ha’u la biban.

Husi odamatan parte lorosa’e, finalista na’in 95 hakat no hakat nafatin ba oin ho kuidadu no sentidu. Ba iha ida idak nia fatin. Múzika “Hei, oan doben sira…” nafatin lian. Lian hakonu Salaun Delta Nova. Serimónia “Juramentu Profisionál” no “Judisium” hahú daudaun. Iha aprezentasaun sientífika. Halo juramentu profisionál. Simu Títulu Akadémiku.

Jornalista: Rafy Belo 

Editór: Cancio Ximenes

HAKEREK NO HATÁN

Please enter your comment!
Please enter your name here