Membru PN sira aprova alokasaun OJE 2021 ba instituisaun Estadu-sira. Imajen Tatoi/Egas Critovão

DILI, 11 dezembru 2020 (TATOLI)- Parlamentu Nasionál, ohin, aprova iha espesialidade, orsamentu tinan fiskál 2021 ba Institutu Jestaun Ekipamentu (IGE) ho montante $5,014,481 no Agência de Promoção de Investimento e Exportação, I.P. (TradeInvest) ho montante  $1,036,354.

Alokasaun orsamentu ba IGE montante $5,014,481 fahe ba kategoria saláriu no vensimentu $1,155,132, bens no servisu $1,859,132 no kapitál menór $2,000,000.

Alokasaun orsamentu tinan fiskál 2021 ba Agência de Promoção de Investimento e Exportação, I.P. (TradeInvest) ho montante $1,036,354, fahe ba kategoria, bens no servisu $1,006,339, kapitál menór $30,015.

Liuhosi diskusaun no aprovasaun orsamentu  ba instituisaun rua hanesan IGE no TradeInvest  ne’e,  membru Parlamentu Nasionál sira aprova ho votu a-favór 42, kontra 0 no abstensaun 0.

Ho orsamentu 2021 ba IGE ho programa prinsipál medida sektorál  mak presta servisu jestaun ba instalasaun ekipamentu, asegura atendimentu  kualidade no  boá infraestrutura bázika atu servisu públiku ba populasaun hotu.

Nune’e mós kontinua formasaun profisionál mákina no mekániku sira, liuhosi treinu hodi aumenta kapasidade no halo expansaun servisu IGE-IP. Aléinde ne’e  dezenvolve Ofisina Nasionál  ba mákina pezadu no  veíkulu  lijeira ho forma kria reseita ba Estadu no kontinua promove boa governasaun, jestaun institusionál inklui fortalese kapasidade rekursu umanu.

Enkuantu ba programa prioridade TradeInvest  iha 2021 mak atu promove, fasilita no monitoriza investimentu privadu no esportasaun.

TradeInvest mós atu aumentu valór investimentu privadu iha territóriu, aumentu númeru esportasaun no mellora parseria iha área investimentu no esportasaun.

TradeInvest mós foku ba  kriasaun Balkaun Úniku ba investidór sira, promove boa governasaun no jestaun institusionál, fortalesimentu kapasidade rekursu umanu.

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here