DILI, 11 dezembru 2020 (PN)—Parlamentu Nasionál (PN), ohin, aprova millaun $1.1 ba Institutu Nasionál Administrasaun Públika (NAP) ne’ebé korresponde ba medida prinsipál setoriál neen (6) hosi institutu refere.
Reprezentante povu sira aprova proposta orsamentu hosi Institutu Nasionál Administrasaun Públika ho rezultadu votasaun a-favór 42, kontra 0 no abstensaun 0.
“Ho nune’e orsamentu orsamentu ba Institutu Nasionál Administrasaun Públika pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál.
Papél hosi Institutu Nasional Administrasaun Públika (INAP) ho misaun asegura realizasaun atividade formasaun no valorizasaun profísional rekursu umanu iha Administrasaun Públika, garante formasaun kontínua ba dirijente no xefia kualifikada sira no espesializada iha Administrasaun Públika.
Nune’e mós promove estudu no investigasaun sientífika kona-ba Administrasaun Públika no realiza rejistu prestada privadu servisu formasaun profísional ba rekursu umanu da Administrasaun Públika, bazeia ba dekretu-lei n.º 15/2017, 17 maiu.
Bazea livru 2 (planu asaun anuál) previstu medida prinsipál setoriál neen (6) mak hanesan realiza asaun formasaun destinadas ba funsionários públiku sira, implementa rejime formadór, reforsa no kapasita korpu formadór iha INAP, promove melloria instalasaun iha INAP inklui dormitóriu, sala ba asaun formasaun no promove governasaun di’ak no jestaun institusionál, fortalese kapasidade rekursu umanu.
Hosi medida prinsipál neen (8) ne’ebé korresponde programa kódigu 510 kona-ba governasaun di’ak no jestaun institusionál sei gasta $1,097,712.00 ne’ebé koloka ba saláriu no vensimetu rihun $415,005, bens no servisu rihun $531,507 no kapitál minór rihun $151,200.
Jornalista: Evaristo Soares Martins
Editór: Cancio Ximenes
