Traballadór sira halo konstrusaun estrada iha Maubara. Imajen Tatoli/António Gonçalves

DILI, 11 dezembru 2020 (TATOLI)—Parlamentu Nasionál durante diskusaun espesialidade, iha sesta ne’e, aprova ona orsamentu ba fundu infraestrutura (FI) hamutuk $33.604.554 ho rezultadu votasaun a-favór 42 kontra no abstensaun 0.

“Ho nune’e orsamentu ba Fundu Infraestrutura pasa,” Prezidente Parlamentu Nasionál, Deputadu Aniceto Longuinhos Lopes, anúnsia liuhosi plenária Parlamentu Nasionál, (11/12).

Fundu infraestrutura ne’e atu finánsia programa no projetu estrantéjiku ne’ebé destinada ba akizasaun, konstrusaun, dezenvolvimentu, manutensau no reabilitasaun hanesan infraestrutura rodaviária inklui estrada, ponte, portu no aeroportu.

Objetivu prinsipál husi Fundu Infraestrutura  ne’e mós atu apoiu projetu estratéjiku sira-ne’ebé hasa’e kresimentu ekonomia Timor-Leste nian.

Fundu ne’e kria iha 2011 hodi fasilita dezenvolvimentu infraestrutura no providénsia fonte finansiamentu ba estrada, ponte, aeroportu, portu, fornesimentu eletrisidade, abastesimentu água, edukasaun, saúde, turizmu no projetu boot sira iha nasaun nian.

Purtantu, kuadru jurídiku Fundu Infraestrutura bazeia ba Lei númeru 1/2016 no  Dekretu-Lei númeru 13/2016, ne’ebé substitui Dekretu-Lei númeru 8/2011 iha tinan 2016  Fundu Infraestrutura transforma ba Fundu Autónomu (FA).

Montante orsamentu millaun $339.605 ne’e kompostu hosi rihun $32 ba saláriu no vensimentu, millaun $1.040 ba bens (sasán) no servisu no millaun $338.533 ba kapitál dezenvolvimentu.

Aleinde ne’e, rihun $60 ba boa-Governasaun no jestaun institusionál, setór agrikultura millaun $3.798, água no saneamentu millaun $3.449, dezenvolvimentu urbana no rurál millaun $6.190, edifísiu públiku millaun $7.693, edifísiu edukasaun millaun $4.843, enérjia elétrika millaun $18.321.

Prevee millaun $41.588 ba kabu submarinu, ekipamentu komputadór, millaun $41,587 saúde millaun $4.844, seguransa no defeza millaun $13.884.

Nune’e mós solidariedade sosiál millaun $1.000, projetu tasi mane millaun $8.500, aeroportu millaun $19.843, preparasaun dezeñu no supervizaun ba projetu foun millaun $9.441, estrada millaun $105.215, ponte millaun $4.896, portu millaun $1.814.

Programa ba setór turizmu rihun $652, programa empréstimu millaun $70.700, programa setór finansa millaun $2.905, Sekretariadu Estadu Juventude no Desportu millaun $2.034, Komisaun Administrasaun Fundu Infraestrutura (KAFI) millaun $1.011, programa manutensaun no reabilitasaun millaun $6.924.

Jornalista :Antónia Gusmão.

Editór :Agapito dos Santos

HAKEREK NO HATÁN

Please enter your comment!
Please enter your name here