Provedora Direitu Umanu no Justisa (PDHJ), Jesuína Maria Gomes, koalia hela ho reprezentante UN Human Right iha Timor-Leste bainhira partisipa iha selebrasaun loron internasional direitu umanu nian ba dala-72, sesta (11/12). Imajen Tatoli/Antonio Goncalves

DILI, 11  dezembru 2020 (TATOLI)-Provedoria Direitu Umanu no Justisa (PDHJ), ohin, iha Dili, selebra loron internasionál  ba direitu umanu.

Iha loron 10 dezembru 2020 nu’udar loron aniversáriu  Deklarasaun Universal Direitu Umanu (DUDU) ba dala-72, nune’e PDHJ kada tinan no tinan ne’e kontinua selebra loron internasionál direitu umanu aliñadu ho tema global “Harii Hikas Fali ho Di’ak: Koloka Direitu Umanu nu’udar Sentru ba Rekuperasaun” ne’ebé iha relasaun ho pandemia COVID-19.

Tinan ne’e komemorasaun iha Timor-Leste PDHJ realiza ho atividade semináriu nasionál ho tema “Halakon Diskriminasaun iha Forma Oi-oin, Luta Hasoru Dezigualdade no Enkoraja Partisipasaun no Solidariedade”.

Provedora Jesuína Maria Ferreira Gomes. Imajen Tatoli/Antonio Goncalves

Provedora Jesuína Maria Ferreira Gomes, hateten, iha loron 10 dezembru 1948, tinan 72 liubá, Asembleia Jerál Nasaun Unida (ONU)  adota deklarasaun universál direitu umanu (DUDU), ne’ebé haklaken DUDU nu’udar dokumentu xave ka padraun komún realizasaun direitu  umanu ba ema hotu-hotu iha nasaun hotu ho finalidade ida katak ema ida-idak ka órgaun ida-idak iha sosiedade laran ka’er metin deklarasaun ne’e iha sira neon.

Nia dehan, DUDU garante direitu umanu ba ema hotu hodi ema hotu-hotu bele dezenvolve nia moris no bele moris ho dignidade, igualdade,  laiha diskriminasaun no partisipasaun sai nu’udar prinsípiu iha deklarasaun universál direitu umanu ne’ebé fundamental loloos.

“Artigu 6 hosi Konstituisaun RDTL hatuur objetivu Estadu mak garante no promove sidadaun sira nia direitu no liberdade fundamental, no respeitu ba Estadu nia prinsípiu kona-bá Estadu demokrátiku no  iha artigu 23 KRDTL mós garante direitu fundamental sira ne’ebé konsagra iha Lei inan,” Provedora Jesuína Maria Ferreira Gomes, hateten iha nia diskursu  iha ámbitu komemorasaun loron internasionál direitu umanu ne’ebé hala’o iha salaun Ministériu Finansa,  Dili.

Nia hateten, maske hatuur ona protesaun sira ne’e iha lei inan  no Estadu Timor -Leste ratifika ona tratadu  prinsipál hitu (7) direitu umanu no integra ona iha enkuadramentu legal no polítika relevante, maibé Timor-Leste sei enfrenta dezafiu oi-oin, ema barak inklui grupu veneravel sira seidauk goza nia direitu ho loloos, komunidade LGBTI sira kontinua hetan diskriminasaun iha sosiedade, feto no labarik feto sira seidauk hetan protesaun didi’ak, sira sai nafatin alvu ba violénsia hosi família no sosiedade.

Jesuína Maria dehan, komunidade sira inklui ema ho defisiénsia sira sei hasoru barreira hodi moris ho adekuadu hanesan asesu ba nutrisaun, saúde, bee-moos, infrastrutura, edukasaun públiku ho kualidade no seluk tan.

“Hanesan akontese iha rai hotu-hotu pandemia Covid-19 fó impaktu boot  ba direitu fundamental sira hanesan direitu ba moris, saúde, liberdade ba espresaun, livre hosi diskriminasaun, rasizmu, xenofobia, estigmatizasaun no naun diskriminasaun, direitu ba informasaun, ba movimentu tantu iha rai-laran no rai-li’ur, direitu ba asembleia, direitu ba privasidade, violasaun iha prizaun, respeitu ba privasidade no direitu selu-seluk,” Jesuína Maria Ferreira Gomes haktuir.

Provedora Jesuína Maria Ferreira Gomes, hateten, ho situasaun ida ne’e, Estadu barak iha mundu inklui Timor-Leste halo esforsu hodi rekupera fila fali situasaun pandemia Covid-19. Estadu Timor-Leste foti medida hodi deklara Estadu Emerjénsia dahuluk iha loron 28 fulan marsu tinan 2020 nu’udar meiu  ida hodi halo prevensaun hada’et Covid-19.

PDHJ nu’udar órgaun independente ida ne’ebé iha funsaun atu apresia no buka dalan atu atende sidadaun sira nia keixa hasoru podér públiku, bele haree ida-idak la’o tuir lei no hala’o prosesu atu hadi’a injustisa.

PDHJ nia kompeténsia mak promove direitu umanus, liberdade no ba garantia fundamental sira ne’ebé hatuur iha artigu 27 Konstituisaun RDTL no tratadu Internasionál direitu umanu ne’ebé  Estadu ratifika tiha ona.

Provedora Jesuína hatutan, durante Estadu Emerjénsia dahuluk to’o daneen (6) PDHJ simu keixa hamutuk 209, hosi keixa ne’e, 79 relasiona ho asuntu direitu umanu liu-liu uza forsa exesiva no keixa 130  relasiona ho prátika administrasaun ladi’ak hosi entidade  públiku sira.

PDHJ nia monitorizasaun foka ba direitu ai-han, direitu ba moris adekuadu, direitu ba traballu, direitu ba edukasaun, direitu ba asisténsia médiku, direitu moris la ho violénsia inklui violénsia doméstika no direitu selu-seluk.

“PDHJ mós loke investigasaun ba kazu ho total 101 ne’ebé  iha indísiu forte ba violasaun direitu umanu no mal administrasaun,” Jesuína Maria dehan.

Nia dehan, PDHJ mós hato’o rekomendasaun, paresér no halo intervensaun direita hodi fó  hanoin ba Governu nune’e bele dezenvolve lejizlasaun no polítika ba prevensaun propagasaun Covid-19 no planu rekuperasaun ekonómiku ho abordajen ba direitu umanu.

Nia hatutan, Governu ho tempu ne’ebé oportunu tebes kontrola no halo prevensaun ho efetivu ba propagasaun Covid-19 iha Timor-Leste, kontrola presu sasán merkadoria ho efetivu iha administrativu sira durante Estadu emerjénsia, implementa medida apoiu subsídiu finanseiru ba agregadu família iha territóriu nasionál hodi rekupera fila fali ekonomia uma laran durante surtu Covid-19.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here