Viveiru ai-oan iha Maubara. Imajen/Egas Cristovão.

DILI, 11 dezembru 2020 (TATOLI)—Dirasaun Jerál Guarda Floresta liuhosi dirasaun floresta no jestaun Bázika hidrográfika, kada tinan sempre prodús ai-oan milliaun ida no fahe gratuita ba komunidade ne’ebé presiza atu kuda.

Diretór Nasionál Floresta Jestaun Bázika Hidrográfika, Adalfredo do Rosário Ferreira, hateten dirasaun jestaun bázika no jestaun hidrográfika nia serbisu ida mak oinsá prodús ai-oan  hodi fahe ba komunidade ne’ebé interesadu hodi kuda ai-oan.

Nia hatutan, dirasaun ne’e prodús ai-oan iha sentru viveiru permanente iha Postu Administrativu Maubara, Munisípiu Likisá, iha Munsípiu Lautém, Viqueque, Manufahi no iha sentru komunitáriu hamutuk 40 iha munisipiu 12.

“Ita prodús ai-oan ne’e ho osan Estadu. Ne’e duni, ai-oan ho nia kuantidade ne’ebé natón atu nune’e fahe ba komunidade ne’ebé hakarak atu kuda,” Adalfredo do Rosário Ferreira informa ba Agência TATOLI iha nia knaar fatin Caicoli, sesta ne’e.

Bainhira distribui ai-oan hirak ne’e, nia esplika, dirasaun sempre fó hanoin ba komunidade atu kuidadu ho didi’ak no fó hanoin atu rega iha tempu bai loron, inklui halo lutu atu nun’e animál sirala bele estraga.

“Ami la iha programa ba reflorestasaun maibé ami fiar katak ai-oan ne’ebé komunidade, ONG, estudante universitáriu sira hetan no asesu ne’e bele ajuda ona ministériu hodi halo reflorestasaun. Tipu ai ne’ebé ami prodús ne’e ai-teka, ai-kasi, ai-tebabui, ai-fuan hanesan kulu, sabraka no marungi,’’ diretór ne’e hateten.

Nia haktuir, ministériu mós hakarak atu implementa no asegura programa Prezidente Repúblika nian kona-ba “Sidadaun Ida, Ai-Oan Ida” ne’e ba oin.

Iha fatin seluk, diretór Organizasaun Naun Governamentál (ONG) Tasi Foho Natureza Verde (TAFON) Green, Crispim Kiku Lopes, hateten durante ne’e organizasaun ne’e simu duni ai-oan hosi dirasaun floresta nian hodi kuda iha fatin balun.

‘’Ami halo proposta ba dirasaun floresta nian, sira konsege fó duni ai-oan hamutuk 50, ami kuda iha suku Bairru-Pité no iha jardin eskola primária iha Tasi Tolu. Tipu ai-oan ne’e mak haneasn ai-minba, ai-Portugál no ai-kakeu,’’nia dehan.

Nia hatutan, iha komemorasaun loron mundiál feto, iha loron 8 fulan marsu 2020, Tafon Green kontinua serbisu hamutuk ho dirasaun floresta hosi munisipiu Aileu no Ainaro ne’ebé oferese ai-oan hamutuk 200 atu kuda.

“Ai-oan hirak ne’e kuda iha Eskola Sekundária Jerál Aileu no iha Eskola Sekundária Jerál Fernando Lasama Ainaro,” nia heteten.

Jornalista: Natalino Costa

Editór: Cancio Ximenes

HAKEREK NO HATÁN

Please enter your comment!
Please enter your name here