DILI, 11 dezembru 2020 (TATOLI)-Komisaun Anti-Korrupsaun (CAC) to’o ohin, halo ona identifikasaun ba jestór loza Dili Mart nian na’in-rua no kargu xefia na’in-rua hosi Ministériu Turizmu Komérsiu no Indústria (MTCI) hodi presta deklarasaun relasiona ho distribuisaun sasán “fuhuk” iha programa Cesta Bázika.
Notísia Relevante : Sasán Cesta Bázika “fuhuk”, CAC bolu obrigatóriu diretora aprovizionamentu MTCI
CAC liuhosi Espesialista Anti-Korrupsaun (EAC), ohin, tuku 9:00 Otl, kontinua tun ba iha edifísiu MTCI hodi bolu obrigatóriu Adjuntu Koordenadór Cesta Bázika hosi MTCI, Rozito Monteiro, hodi halo identifikasaun.
“Ha’u labele ko’alia buat barak tanba buat hotu ha’u hato’o ona CAC parte investigasaun ninian hodi klarifika saida mak ha’u hatene,” Adjuntu Koordenadór Cesta Bázika hosi MTCI, Rozito Monteiro lia tun ba jornalista sira iha edifísiu CAC, Faról, Dili, hafoin remata presta deklarasaun iha CAC.
Tuir informasaun ne’ebé Agência Tatoli asesu hosi CAC, katak iha tuku 14:00 Otl, EAC-CAC sei kontinua halo identifikasaun ba ema balun hosi MTCI no posibilidade bolu mós Governante balun hodi presta deklarasaun.
Notísia Relevante : Sasán Cesta Bázika “fuhuk”, CAC kontinua investiga jerente Dili Mart
Tuir prosedimentu prazu identifikasaun durante oras 12 hodi presta deklarasaun ne’ebé iha mós evidénsia-sira hanesan sasán ‘’fuhuk” no kuantidade sasán la korresponde ba valór osan ne’ebé determina, ba notifikasaun CAC nian hodi haree se iha indísiu prezuiju ba Estadu sei halo auto notísia ba Ministériu Públiku nu’udar na’in ba asaun penál hodi halo mandadu detensaun no submete ba primeiru interrogatóriu iha Tribunál primeira instánsia.
Iha loron 10 dezembru ne’e, tuku 09:25 Otl, ekipa CAC tun direita ba ramu loza Dili Mart nian ida iha Raikotu, Comoro, Dili, hodi bolu obrigatóriu jerente kompañia Dili Mart no iha loron hanesan, tuku 11:00 Otl, kontinua tun ba iha loza Dili Mart nian iha Bidau-Akadiruhun, Dili, hodi bolu mós jestór prinsipál Dili Mart nian ida tan.
Iha tempu hanesan iha tuku 14:00 Otl, EAC-CAC mós tun ba edifísiu MTCI iha Mandarin, hodi bolu obrigatóriu atuál Diretora Aprovizionamentu MTCI, Maria dos Martires.
Daudaun ne’e CAC halo ona identifikasaun ba jestór Dili Mart nian na’in-rua no funsionáriu MTCI na’in-rua, relasiona ho sasán “fuhuk” Cesta Bázika, ne’ebé distribui ba komunidade sira iha Suku Comoro, Postu Administrativu Don Aleixo, Munisípiu Dili, kuarta (09/12).
Jornalista : Nelson de Sousa
Editór : Francisco Simões
