Rezultadu prosesamentu bambuu ba nesesidade mobiliáriu ho kualidade hosi Sentru Bambuu Timor-Leste. Imajen/Guide Post

DILI, 11 dezembru 2020 (TATOLI)- Parlamentu Nasionál, aprova iha faze espesialidade alokasaun Orsamentu Jerál Estadu (OJE) ba Institutu Peskiza, Dezenvolvimentu, Formasaun no Promosaun ba Bambuu, Institutu Públiku (IPDFPB.IP) ho montante $623,971 hodi prioritiza hasa’e produsaun no komersializa bambuu iha merkadu nasionál no internasionál.

Mobiliáriu ho kualidade hosi bambuu ne’ebé prodús hosi Sentru Bambuu Timor-Leste. Imajen/Guide Post

Hosi totál orsamentu tinan fiskál 2021 nian ba IPDFPB.IP fahe ba kategoria bens no servisu $506,334, kapitál menór $44,300 no kapitál dezenvolvimentu $73,337.

Liuhosi diskusaun no alokasaun ne’e, membru Parlamentu Nasionál sira aprova ho votu a-favór 42, kontra 0 no abstensaun 0.

Hafoin aprovasaun, Xefe Bankada Partidu Demokrátiku (PD), António da Conceição, husu ba Governu atu bele hahú halo promosaun produtu sira ne’ebé prodús bambuu iha merkadu nasionál no internasionál tanba ho kualidade.

“Ha’u husu atu iha tinan oin ita hahú halo promosaun ba produtu sira ne’e tanba iha kualidade hanesan meza tanba ho kualidade,” Xefe Bankada PD ne’e afirma, ohin, hafoin fó votu a-favór ba orsamentu tinan fiskál 2021 ba sentru Bambuu iha Parlamentu Nasionál.

Deputadu António husu ba Governu atu hahú hanoin ona atu sosa mós produtu sira ne’e ba instituisaun Estadu sira hodi minimiza hasai osan ba sosa produtu seluk ne’ebé laiha kualidade.

“Ita tenke hahú ona komersializa produtu sira ne’e atu kompete iha merkadoria hodi hatama mós reseita ba Estadu,” nia sujere.

Programa prinsipál medida sektorál 2021, institutu ne’e kontinua insentiva hodi dezenvolve produsaun no komersializa produtu  bambuu, kontinua insentiva agrikultór ba  kriasaun viveiru no aumentu plantasaun atu bele sustentável iha futuru.

Aléinde ne’e, asegura matéria prima bambuu (ripas e troncos) atu fasilita  servisu transformasaun, produsaun  produtu bambuu ho kualidade no asegura hodi aumenta reseita.

Ikus liu,  implementa  polítika jéneru, promove boa governasaun no jestaun institusionál no fortalese kapasidade rekursu umanu.

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here