Tékniku EDTL halo instalasaun eletrisidade iha área Bebora, Dili. Imajen TATOLI/Antó Gonçalves

MANATUTO, 10 dezembru 2020 (TATOLI)—Xefe Suku Lakumesak, Filomeno Rodrigues Pereira Cárceres, informa problema prinsipal ne’ebé Suku Lakumesak mak to’o oras ne’e komunidade iha Suku Lakumesak, Postu Administrativu Lacló, Munisípiu Manatuto seidauk asesu ba eletrisidade, estrada no bee-moos.

Notísia Relevante: Populasaun 2.933 iha suku Lakumesa asesu Cesta Bázika

“Ami nia problema boot liu mak estrada ne’ebé to’o oras ne’e kontinua aat ba bebeik. Tuir fali mak bee moos iha tempu bai-loron naruk tenke ba kuru iha mota. Eletreesidade iha ha’u-nia Aldeia Laububu, Hatukonan no Sub-aldeia Kará mak to’o oras ne’e sei moris iha nakukun laran,” Filomeno Rodrigues Pereira Cárceres hateten ba jornalísta sira hafoin lansamentu programa Cesta Bázika iha sede suku Lakumesak, kinta ne’e.

Autoridade Lokál ne’e hatutan, problema ne’ebé akontese, la’ós de’it ba komunidade iha suku Lakumesak, maibé mós ba komunidade tomak iha Postu Administrativu Lacló. Nia rekomenda ba Governu atu tau matan ba problema ne’ebé sira hasoru hodi hadi’a sira-nia estrada hosi suku ba to’o aldeia.

“Ha’u reprezenta komunidade suku ida-ne’e husu ba Governu atu tau orsamentu ba tinan oin, hodi fó prioridade atu hadi’a ami nia Estrada, nune’e bele lori produtu ba merkadu,” nia husu.

Xefe suku ne’e esplika, maiória populasaun iha suku ne’e moris ho agrikultura hanesan halo natar, hakiak ikan no produtu ne’ebé koñesidu liu mak akar.

“Dezde Timor-Leste nia independénsia iha loron 20 fulan maiu 2002, to’o oras ne’e, problema jerál ne’ebé povu iha Postu Administrativu Lacló hasoru mak estrada ho kondisaun kontinua aat ba bebeik,” Filomeno Rodrigues aprezenta.

Entretantu, suku Lakumesak kompostu husi aldeia lima mak hanesan Readodok, Tahagamu, Nakaleo, Labubu, ho Hatukonan.

Jornalista: Natalino Costa

Editór: Cancio Ximenes

HAKEREK NO HATÁN

Please enter your comment!
Please enter your name here