Diretora Serbisu Saude Munisipiu Dili, Agostinha Segurado.Imajen/Antonio Goncalves

DILI, 10 dezembru 2020 (TATOLI)—Diretora Servisu Saúde Munisípiu Dili, Agostinha Seguradu, hateten daudaun ne’e orienta ona Sentru Saúde neen iha Munisípiu Dili atu prepara kaixa informasaun ba komunidade atu hato’o keixa bainhira la satisfas ho prosesu atendimentu saúde husi profisionál saúde sira.

“Ha’u orienta ona ekipa sira prepara kaixa informasaun ba sentru saúde neen hanesan Sentru Saúde Becora, Formoza I, Formoza II, Sentru Saúde Comoro Sentru Saúde Metinaro no Atauro para bele hetan problema ne’e iha parte hotu hotu,”  nia dehan ba jornalista sira iha ninia servisu fatin, kinta ne’e.

Dalabarak mosu kazu dezintendimentu entre pesoál saúde ho pasiente sira tanba, pasiente sira la kumpre konsulta, tuir loloos oras konsulta iha parte dadeer maibé pasiente sira mai fali iha meudia.

“Kazu baibain sira hanesan mear, inus been ne’e mai dadeer para hetan atendimentu husi pesoál saúde la’ós mai fali meudia, mai meudia atende de’it kazu emerjénsia,” tenik tan.

Mezmu nune’e ezekutiva ne’e apela ba profisionál saúde sira iha Dili atu fó nafatin atendimentu ba pasiente sira ho profesionál no mós evita abandona servisu iha oras servisu nian.

”Atu se deit kolabora ho saúde Munisípiu Dili atu fo opiniaun liga ho atendimentu sira la diak liberdade no avontade ba ema se de’it atu hato’o ida ne’e importante mak atu hato’o keixa ne’e tuir nia fatin para ha’u bele fó atensaun ba sira,” nia hateten.

Jornalista :Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here