Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze espesialidade, iha sala plenária PN. Imajen Tatoli/Egas Cristovão

DILI, 10 dezembru 2020 (TATOLI)—Proposta Orsamentu Jerál Estadu (OJE) ho montante $19,942,903.00 hosi Ministériu Solidariedade Sosiál no Inkluzaun (MSSI) pasa iha faze espesialidade.

Proposta hosi Ministériu Solidariedade Sosiál no Inkluzaun aprova ho rezultadu votasaun a-favór 43, kontra 0 no abstensaun 0.

“Ho orsamentu Ministériu Solidariedade Sosiál no Inkluzaun pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kinta ne’e.

 Bazeia livru 2 (Planu Asaun Anuál) hosi MSSI nian previstu medida prinsipál setoriál ba tinan fiskál 2021 mak hanesan instala, asegura gestaun di’ak no fortalese sistema integrada protesaun sosiál, halo jetsaun kona-ba inisitiva asisténsia sosiál nian, promove no proteje direitu labarik sira-nian, kontribui hodi kombate HIV/SIDA, promove reabilitatasaun sosiál, akonsellamentu no rekuperasaun.

Nune’e mós, MSSI asegura atendimentu kualidade ba sidadaun sira iha situasaun vulnerabilidade sosiál, liuhosi implementasaun polítika no programa protesaun sosiál, asisténsia sosiál, reabilitasaun no seguransa sosiál, hahú hosi nível nasionál no munisipál.

Medida prinsipál hosi MSSI sei promove inisiativa reinsersaun no inkluzaun komunitária, implementa polítika jéneru no promove governasaun di’ak no jestaun institusionál

Hosi medida prinsipál hirak ne’e, MSSI propoin $19,942,903.00 iha proposta-lei OJE tinan fiskál 2021, ne’ebé koloka ba saláriu vensimentu $1,772,000.00, bens servisu $5,979,456,00 kapitál minór rihun $721, kapitál dezenvolvimentu $2,016,000.00 no transferénsia públika $9,454,447.00.

Entretantu alokasaun orsamentál kada programa kompostu hosi programa ho kódigu 412 (implementasaun polítika jéneru) sei gasta rihun $427,100, programa ho kódigu 442 (kombate HIV-SIDA iha Timor-Leste sei gasta orsamentu  rihun $578,990, programa ho kódigu 443 (promosaun no protesaun ba direitu labarik, sei gasta rihun $375,657, programa ho kódigu 510 (boa governasaun no jestaun institusionál, sei gasta $7,593,496.00, programa ho kódigu 577 (sistema integradu protesaun sosiál) sei gasta rihun $400.

Nune’e mós programa ho kódigu 578 kona-ba reabilitasaun sosiál, akonsellamentu noo rekuperasaun, sei gasta rihun $160,792, programa ho kódigu 580 (asisténsia sosiál), sei gasta $8,655,795.00 no programa ho kódigu 581 (reinsersaun no Inkluzaun komunitária) sei gasta $2,150,673.00

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here