Imajen/Media PR.

DILI, 10 dezembru 2020 (TATOLI)—Prezidente Repúblika (PR), Francisco Guterres Lú Olo, ohin, sei atribui Prémiu Direitu Umanu “Sérgio Vieira de Mello” ba edisaun-13 ba manan-na’in na’in-lima. Manán-na’in na’in-lima ne’e, iha tinan barak nia laran hatudu hosi ezemplu serbisu hodi defende, promove no divulga Direitu Umanu iha Timor-Leste (TL).

Komunikadu ne’ebé fó sai hosi prezidénsia Repúblika hateten, liuhosi Dekretu Prezidente Repúblika númeru 71/2020, 10 dezembru, Xefe Estadu sei atribui Prémiu Direitu Umanu “Sérgio Vieira de Mello” ba manán-na’in ho kategoria Direitu Sosiál, Ekonómiku no Kulturál ba Cosme dos Santos Freitas, Pe. Martin António Pablo Abad Santos, S.J, Deolindo da Costa no Leopoldina Joana Guterres. Manan-na’in ba kategoria Direitu Sivíl no Polítiku mak FOKUPERS.

Tinan-tinan iha loron adosaun Deklarasaun Universál Direitu Umanu iha Asembleia Jerál Organizasaun Nasaun Unida, ne’ebé koñesidu nu’udár loron Internasionál ba Direitu Umanu, 10 dezembru, Prezidente Repúblika atribui Prémiu Direitu Umanu “Sérgio Vieira de Mello” ba sidadaun no organizasaun ne’ebé promove, defende no divulga Direitu Umanu iha Timor-Leste.

Anualmente, Prezidente Repúblika loke oportunidade ba sidadaun timoroan no estranjeiru hosi organizasaun governamentál no la’ós governamentál atu hatama sira-nia kandidatura ba Prémiu Direitu Umanu “Sérgio Vieira de Mello” tuir kritériu sira ne’ebé estabese.

Hafoin Konsellu Agradesimentu no órden onorífika halo análize, apresiasaun no vizita ba fatin implementasaun atividade hosi kandidatu sira, órgaun konsultiva ne’e sei hato’o ba Prezidente Repúblika atu deside manán-na’in ba Prémiu.

Prémiu Direitu Umanu “Sérgio Vieira de Mello” harii ho Dekretu-Lei númeru 15/2009, 18 marsu, atu rekoñese no destaka atividade sidadaun timoroan no estranjeiru, hosi organizasaun governamentál no la’ós governamentál, ba promosaun, defeza no divulgasaun Direitu Umanu iha Timor-Leste.

Kada manán-na’in ba Prémiu Direitu Umanu “Sergio Vieira de Mello ne’e, sei hetan prémiu ho valór osan $10.000.

Prémiu Direitu Umanu hahú iha tinan-2008, liuhosi inisiativa Prezidente Repúblika, Laureadu Nobél da Páz, José Ramos Horta atribui ba sidadaun ka organizasaun governamentál ka la’ós  governamentál, hosi Timor-Leste ka hosi estranjeiru hodi promove, defende no divulga Direitu Umanu iha Timor-Leste.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here