Ema ho defisiénsia sira uainhira partisipa iha workshop kona-ba sensibilizasaun Planu Nasionál ba Ema ho Defisiénsia ba Setór Edukasaun 2020-2024, iha Salaun Infordepe, Balide Dili, 1 Otubro 2020.Imajen/António Gonçalves

DILI, 10 dezembru 2020 (TATOLI)—Adjunta Provedora Direitu Umanu, Benicia Eriana Magno hateten, ema hotu iha obrigasaun atu proteje no promove partisipasaun ema ho defisiénsia iha setór hotu.

“Ita hotu hanesan individu, iha obrigasaun atu promove no proteze ema ho defisiénsia no muda ita-nia atetude, uza linguajen ne’ebé la diskrimana sira. Ita tenke promove sira-nia partisipasaun iha setór hotu,” Benicia Eriana Magno hateten lia hirak ne’e bainhira sai oradora iha eventu Quiz direitu umanu ne’ebé realiza iha salaun koferénsia Centro Nacional Chega (CNC), Antigu Komarka, Balide, Dili, kinta ne’e.

Provedora Adjunta Direitu Umanu ne’e rekoñese katak, ema ho defisiénsia sei enfrenta barreira oioin hanesan atitude, sosiál, fíziku, transporte, komunikasaun, maibé nia fiar katak ida-ne’e Estadu mak iha papél importante atu promove no fó protesaun.

Benicia Eriana Magno apela ba parte hotu atu fornese direitu no liberdade hodi fó protesaun ba ema ho defisiénsia nune’e bele goza sira-nia direitu iha setór hotu-hotu.

“Ita-nia profisaun espesífiku iha ita-nia konstituisaun, artigu 23 hatutan direitu fundamentál sira-ne’ebé konsagra iha ita-nia lei inan no tenke interpreta tuir direitu umanu universál nian ne’ebé ohin loron ita selebra tinan 72 hafoin Nasaun Unida adota iha tinan 12 liubá,” Benicia Eriana Magno hateten.

Nia rekoñese katak, Timor-Leste ratifika konvensaun ka tratadu importante direitu umanu prinsipál hitu, maibé infelizmente Timor-Leste seidauk ratifika tratadu direitu ba ema ho defisiénsia.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here