Imajen/Media PR.

DILI, 10 dezembru 2020 (TATOLI)—Prezidente Repúblika (PR), Francisco Guterres Lú Olo atribui prémiu direitu umanu Sérgio Vieira de Mello ba ema na’in-haat no organizasaun ida ne’ebé selesionadu iha tinan ida-ne’e.

Notisia Relevante: Promotor-Defensór Direitu Umanu na’in-5 manán Prémiu Sérgio Vieira de Mello

Prezidente Repúblika, Francisco Guterres Lú Olo hateten, iha tinan ida-ne’e prezidénsia repúblika simu hamutuk kandidatu na’in-24, kandidatu na’in-hitu (7) hosi kategoria direitu sivíl no polítiku no kandidatu na’in-17 hosi kategoria direitu ekonómiku, sosiál no kulturál.

“Liuhusi prosesu selesaun, Konsellu Agrasiamentu no Ordem Onorífika halo verifikasaun ba kandidatura hotu, vizita kandidatu sira-ne’ebé liu selesaun dokumentasaun nian, ko’alia ho sira, ko’alia ho proponente sira no komunidade sira, akompaña sira-nia serbisu to’o ikus selesiona kandidatu na’in-lima (5), indivídu na’in-haat (4) no organizasaun naun-governamentál ida (1), nu’udár manan-na’in ba Prémiu Direitu Umanu Sérgio Vieira de Mello ba tinan 2020,” Xefe Estadu hateten iha diskursu atribuisaun prémiu ne’ebé hala’o iha palásiu prezidensiál Nicolau Lobato, Bairru-Pité, Dili, kinta ne’e.

Nia hateten, iha katerogia Direitu Sosiál, Ekonómiku no kulturál manan-na’in sira mak Cosme dos Santos Freitas hosi Dili, Padre António Martins Abad Santos Pablo, SJ, hosi Ermera, Deolindo da Costa hosi Maliana, no Leopoldina Joana Guterres hosi Baucau. Iha kategoria direitu sivíl no polítiku manan-na’in mak, organizasaun Forum Komunikasaun Feto (FOKUPERS), bazeada iha Dili.

Prezidente Repúblika fó Parabéns ba manan-na’ín sira no haksolok ho prezensa manán-na’in sira hodi simu prémiu ne’ebé iha, liuliu hodi bele koñese di’ak liután ida-idak nia atividade no rekoñese valór no impaktu ne’ebé manán-na’in sira iha ba manutensaun direitu Umanu iha País ne’e.

Cosme dos Santos Freitas

Imajen/Media PR.

Cosme dos Santos Freitas nu’udár profesór iha Eskola Sekundária FINANTIL no mós koordenadór Pré-Eskolár Bemmalaia Cordiosa de Arcanjos, iha defisiénsia iha ninia matan ne’ebé mosu iha tempu okupasaun, bainhira subar iha Foho Matebian. Maske ho defisiénsia ida-ne’e Profesór Cosme dos Santos Freitas halo esforsu atu labarik sira hetan asesu ba edukasaun.

Labarik sira-ne’ebé mak sira-nia família iha kbiit finanseiru, bele hetan asesu ba edukasaun ho kualidade ne’ebé di’ak, maibé labarik sira-ne’ebé mak sira-nia família laiha kbiit finanseiru hasoru difikuldade atu hetan asesu ba edukasaun ho kualidade ne’ebé di’ak.

Faktu ida-ne’e mak enkoraja Professór Cosme dos Santos Freitas atu harii ensinu pré-eskolár ida, ho intensaun atu halo investimentu ba rekursu umanu ne’ebé bele fó esperansa boot ba futuru Timor-Leste nian.

Profesór Cosme dos Santos Freitas uza ninia osan rasik hosi ninia saláriu nu’udár profesór no husu empréstimu osan hosi banku hodi hahú halo kontrusaun ensinu pré-eskolár ne’ebé refere. Tanba osan la to’o, nia kontinua husu nafatin empréstimu hosi ema seluk hodi kontinua konstrusaun eskola refere.

Tanba osan la to’o nafatin atu finaliza eskola ne’ebé refere, Profesór Cosme ninia kaben halo negósiu faan modo no faan fahi hodi ajuda finaliza konstrusaun sala tolu to’o ramata no sala rua seluk sei iha prosesu konstrusaun.

Ensinu Pré-Eskolár ne’e naran Bemmalaia Cordiosa de Arcanjos iha Aldeia Laulora, Suku Manleuana, Dili, no Visé-Ministru Edukasaun inaugura eskola refere iha loron 25 fulan-marsu tinan 2019.         

Maske dala barak nesesidade uma-laran nian la to’o, Profesór Cosme dos Santos Freitas la rende atu kontinua halo obra boot ne’ebé mak nia halo tiha ona. La’ós deit harii eskola maibé mós selu profesór voluntáriu sira-ne’ebé mak hanorin iha eskola hosi ninia saláriu rasik. Maske Profesór Cosme dos Santos Freitas hasoru difikuldade oioin, nia hatudu ninia espíritu voluntarizmu no persisténsia.

Padre António Martins Abad Santos Pablo, S.J

Padre António Martins Abad Santos Pablo, S.J. hanesan misionáriu hosi kongresaun Jezuita ne’ebé halo misaun iha Parókia Nossa Senhora de Fátima Railaku, Ermera.

Padre António la’ós serbi de’it sarani sira iha parókia refere iha parte espirituál nian maibé nia mós halo formasaun no klínika, vizita sarani sira hodi hatene loloos sira-nia kondisaun moris no halo programa ida naran programa alimentasaun kontra má-nutrisaun.

Hamutuk ho ekipa voluntáriu sira, Padre António realiza programa alimentasaun ne’e no hakbesik-aan ba família sira iha área rurál hodi fó ai-han ba labarik sira ne’ebé mak sofre duni hosi má-nutrisaun. Programa ne’e la’o konsistente no la pára fó ai-han saudável ba labarik sira ne’ebé mak presiza duni. Problema má-nutrisaun nu’udár problema ida-ne’ebé sériu tanba fó impaktu ba futuru Timor-Leste nian.    

Deolindo da Costa

Deolindo da Costa simu premiu. Imajen/Media PR

Deolindo da Costa harii Uma Enkorajementu iha Maliana, ho objetivu atu akomoda estudante sira hosi área rurál ne’ebé mak laiha kbiit finanseiru no mai hosi área sira-ne’ebé dook, nune’e bele kontinua sira-nia estudu. Ho inisiativa ida-ne’e, sira bele hetan asesu ba edukasaun, Estudante barak mak iha difikuldade kona-ba hela-fatin.

Uma Enkorajementu ne’e fasilita ona estudante barak hodi bele kontinua sira-nia estudu. Jerasaun foinsa’e sira-ne’ebé mak iha poténsia atu kontinua estudu, labele pára estudu tanba de’it laiha hela-fatin.  Uma Enkorajementu ne’e mós iha ninia fasilidade ne’ebé fornese kursu, hanesan: komputadór, lian-inglés no administrasaun.

Ezisténsia Uma Enkorajamentu ne’e ajuda hamenus todan finanseiru ne’ebé mak inan-aman sira hasoru bainhira haruka sira-nia oan asesu ba edukasaun.

Leopoldina Joana Guterres

Leopoldina Joana Guterres, profesora ida-ne’ebé iha neon nakloke, hala’o atividade oioin hamutuk ho komunidade sira liuliu iha área rurál sira atu hasa’e kreatividade no empreendedorizmu. Profesora Leopoldina Joana Guterres halo esforsu atu haburas komunidade ninia neon kona-ba oinsá atu uza rekursu naturál ho domin no respeitu.

Hamutuk ho ninia káben no ho apoiu hosi ema seluk tan, harii Fundasaun HO MUSAN IDA. Fundasaun ne’e hala’o ninia programa dahuluk iha área florestál iha Baguia, ne’ebé la’ós de’it atu kuda ai-horis maibé atu haburas ideia oioin hosi ideia prinsipál ne’ebé bele hasa’e edukasaun no formasaun vokasionál kona-ba kestaun agro-florestál no permakultura no fó impaktu pozitivu ba ekonomia lokál.

Profesora Leopoldina Joana Guterres hamutuk ho komunidade Baguia kuda ai-horis oioin, liuliu Mahoni, Teka no Ai-Kameli. Profesora Leopoldina Joana Guterres preokupa tebes ho kestaun alterasaun klimátika no halo esforsu atu lori komunidade sira foka liu ba ambiente saudável no sustentável.

Liuhosi atividade kuda ai-horis, komunidade sira konsege hamoris fila-fali bee naturál iha fatin balun. Nia fokus ba: aumenta rendimentu lokál, kria serbisu produtivu, hamenus ki’ak no hamlaha, haforsa komunidade lokál sira-nia inisiativa rasik.

Organizasaun FOKUPERS

Organizasaun FOKUPERS hatudu ona ninia prestasaun serbisu ho kualidade. Serbisu sira balun inklui fó asisténsia ba vítima feto no labarik sira, halo kampaña atu hametin kultura dame no laiha violénsia, hametin igualdade jéneru ho hakbiit feto sira.

Espesifikamente FOKUPERS ninia atividade sira balun ligadu ho igualdade jéneru, kampaña kona-ba direitu umanu en jerál ba feto sira no labarik, proteje vítima violénsia bazeadu ba jéneru, tau matan ba vítima violénsia doméstika no fó asisténsia ba feto sira atu sira hadi’a no aumenta sira-nia rekursu ekonomia.

FOKUPERS sai ona mahon ba feto no labarik sira iha tempu susar no reafirma nafatin ninia kompromisu atu kontinua ninia atividade sira.      

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here