Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze espesialidade, iha sala plenária PN. Imajen Tatoli/Egas Cristovão

DILI, 10 dezembru 2020 (TATOLI)- Parlamentu Nasionál aprova ona orsamentu tinan fiskál 2021 ba Ministériu Transporte no Komunikasaun (MTC) iha faze espesialidade ho montante $13,348,279.

Hosi montante orsamentu ba MTC ne’e fahe ba kategoria saláriu no vensimentu $1,663, bens no servisu $6,427, transferénsia públika $1,550, kapitál menór $1,133, kapitál dezenvolvimentu $2,575.

Liuhosi diskusaun no aprovasaun iha faze espesialidade  ne’e, membru Parlamentu Nasionál sira aprova ho votu a-favór 38, kontra 0 no abstensaun 0.

“Orsamentu ba Ministériu Transporte no Komunikasaun pasa,” prezidente Parlamentu Nasionál, Aniceto Longuinhos Guterres, afirma hafoin votasaun espesialidade iha sala plenáriu Parlamentu Nasionál.

Programa medida prinsipál no sektorál 2021, MTC mak garante jestaun ba sistema transporte terrestre, promove dezenvolvimentu no jestaun infraestrutura no komunikasaun, asegura jestaun operasaun meteorolojia no jeofízika.

Nune’e mós garante funsionamentu normál no sirkulasaun ba meiu transporte marítimu, aero, prestasaun servisu portuáriu sira, implementasaun polítika jéneru, promove boa governasaun no jestaun institusionál.

 Orsamentu tinan fiskál 2021 ba MTC hamutuk $13,348,279, inklui $3,042,000 atu bele implementa atividade liga medida planu rekuperasaun ekonómika. Tanba papél MTC hanesan departamentu governamentál ne’ebé responsavel konsesaun, ezekusaun koordenasaun no avaliasaun polítika, definida no aprovada hosi  Konsellu Ministru, ba área transporte no komunikasaun (artigu númeru 2, Dekretu-Lei númeru 6/2019, loron 3 abríl).

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here