DILI, 10 dezembru 2020 (TATOLI)—Parlamentu Nasionál (PN) kinta ne’e aprova millaun $31 hodi halo prevensaun no mitigasaun ba surtu COVID-19 iha tinan fiskál 2021.

Programa ho kódigu 508 kona-ba prevensaun no mitigasaun COVID-19 sei gasta millaun $31 ne’e aprovadu ho rezultadu votasaun a-favór 43, kontra 0 no abstensaun 0.

“Ho nune’e orsamentu hodi halo jestaun ba pandemia COVID-19 pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kinta ne’e.

Papél hosi jestaun ba fundu COVID-19 liuhosi Lei n.º 2/2020, 6  abríl, ne’ebé Parlamento Nasionál prosede  kriasaun Fundo COVID-19, hodi finánsia despeza relasaun ho prevensaun no  kombate moras COVID-19, administrando, nomeadamente, nu’udar parte transferénsia extraordinária hosi Fundu Petrolíferu ne’ebé autoriza hosi Parlamento Nasionál. Fundu ne’e finánsia despeza relasaun ho prevensaun no kombate moras COVID-19 bazeia ba Dekretu-Lei 12/2020, 14 abríl.

Medida prinsipál setoriál hosi jestaun fundu COVID-19 ne’e mak halo akizisaun medikamentu, materiál no  ekipamentu médiku hodi uza ba prevensaun no kombate vírus SARS-Covid-2 moras COVID-19 inklui halo kontratasaun servisu transporte aéreu, bainiranesesáriu;

Nune’e mós halo instalasaun no manutensaun ba kuarentena no izolamento no halo protesaun sosiál ba vítima vírus SARS-Cov-2 no moras COVID-19.

Hosi montante orsamentu $31,000,000.00 ne’e koloka ba bens no servisu $23,875,000.00, kapitál dezenvolvimentu $3,625,000.00 no transferénsia públika $3,500,000.00

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here