Primeiru-Ministru, Taur Matan Ruak, hamutuk ho membru Governu sira defende proposta OJE 2021 iha debate faze espesialidade iha sala plenária PN. Imajen Tatoli/Egas Cristovão

DILI, 10 dezembru 2020 (TATOLI)- Parlamentu Nasionál (PN), ohin, aprova iha faze espesialidade alokasaun orsamentu Jerál Estadu (OJE) 2021 ba Ministériu Obra Públiku (MOP) ho montante $240,673,539.

Hosi totál orsamentu ne’e inklui ona $158,357,031 destinadu ba provizaun despeza kombustivel no manutensaun jeradór liña tranzmisaun no $21,503,286 destinada ba implementasaun atividade relasiona medida-sira hosi planu rekuperasaun ekonómika.

Liuhosi diskusaun faze espesialidade OJE 2021 ba MOP nian ne’e, membru PN sira aprova ho votu a-favór 44, kontra 0 no abstensaun 0.

Deputadu-sira submete proposta tolu hanesan númeru 52-53 atu transfere osan millaun $1,2 iha kategoria transferénsia publika ba kapitál dezenvolvimentu,  inklui proposta  54 atu halo transferénsia orsamentu iha kategoria transferénsia públiku millaun $1,2 ba kapitál dezenvolvimentu hodi  finansia transformasaun ajénsia EDTL ho Agua no Saneamentu ba empreza públiku.

Hatán ba proposta sira ne’e, Ministru Obra Públiku (MOP), Salvadór Eugénio Soares dos Reis Pires, hateten ba proposta 54 atu halo transferénsia proposta ne’e MOP simu no agradese tanba halo jestaun durante transferénsia millaun $1,2 tanba  jestaun internal de’it.

“Ba proposta númeru 52 no 53 ami rejeita tanba prevee orsamentu iha tinan fiskál ne’e iha alokasaun ba kestaun ne’e ona,” Ministru Salvadór afirma. Nune’e, proponente-sira deside retira proposta 52 no 53, maibé sujere atu MOP kontinua foku asuntu ba eletrisidade no bee-moos atu sidadaun hotu bele asesu.

2021, Ministériu  Obra Publika (MOP) foku medida prinsipál sektorál  hanesan, prosege konstrusaun, reabilitasaun, manutensaun, jestaun estrada no ponte-sira iha rede nasionál, inklui estrada regional no rural-sira, ne’ebé liga área produtiva iha merkadu.

Nune’e mós implementa programa kontrolu inundasaun no situasaun emerjénsia, ho forma atu asegura konetividade iha territóriu nasionál tomak.

MOP mós introdús mellora sistema abastesimentu bee (água), inklui konstrusaun no reabilitasaun saneamentu komunidade iha área urbana, rural, sentru saúde no suku no asegura normal abastesimentu bee ba benefísiu sidadaun sira.

Reforsa kuadru legal abastesimentu bee no jestaun rekursu hídriku, garante kontinuidade programa eletrifikasaun iha nivel nasionál no instala liña distribuisaun.

Introdús mellora  sistema produsaun no fornesimentu enerjia elétrika ho forma viavel no sustentável. Garantia kontrolu kualidade konstrusaun sivíl no obra publika. Promove boa governasaun no jestaun institusionál.

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here