Primeiru-Ministru, Taur Matan Ruak, hamutuk ho membru Governu sira defende Proposta OJE 2021 iha debate faze espesialidade, iha sala plenária PN. Imajen Tatoli/Egas Cristovão

DILI, 10 dezembru  2020 (TATOLI)—Proposta orsamentu ba tinan fiskál 2021 hosi Ministériu Defeza (MD) ho montante $14,050,485 pasa iha iha faze espesialidade ho rezultadu votasaun a-favór 40, kontra 0 no abstensaun 0.

“Ho nune’e orsamentu Ministériu Defeza pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kinta ne’e.

Papél Ministériu Defeza nu’udar departamentu governamentál responsável ba konsesaun, ezekusaun, koordenasaun no avaliasaun polítika, definida no aprovada hosi Konsellu Ministru, iha área defeza nasionál no kooperasaun militár, bazeia ba artigu 2º Dekretu-Lei n.º 7/2019, 17 abríl.

Medida prinisipál setoriál hosi Ministériu Defeza ba tinan fiskál 2021 mak promove, garante no salvaguarda defeza nasionál.

Hosi medida ida-ne’e sei halo rekrutamentu ba forsa foun, promove no mellora saúde jerál membru efetivu F-FDTL nian, partisipa ezersísiu kombinadu iha ámbitu kooperasaun tékniku militár no organizasaun internasionál

Iha medida prinsipál dahuluk ne’e sei realiza operasaun ba garante estabilidade, seguransa, apoia populasaun, defeza rekursu naturál, promove melloramentu kondisaun militár liuhosi manutensaun, rekuperasaun instalasaun militár sira.

Nune’e mós halo melloramentu no manutensaun meiu transporte, ekipamentu no dezenvolvimentu kapasidade interna no dezenvolve sistema baze dadus lojístika ho kualidade.

Medida prinsipál setoriál daruak ne’e mós implementa polítika jéneru no medida prinsipál datoluk mak kontinua promove governasaun di’ak no jestaun institusionál iha ministériu refere.

Hosi medida prinsipál hirak ne’e Ministériu Defeza (MD) propoin montante orsamentu  $14,050,485 ba tinan fiskál 2021, ne’ebé koloka ba saláriu vensimentu $1,366,835.00 bens servisu $8,298,649.00 kapitál minór $1,982,001.00 kapitál dezenvolvimentu $2,403,000.

Alokasaun orsamentál kada programa mak hanesan programa ho kódigu 388 kona-ba defeza nasionál sei gasta $11,048,073, programa ho kódigu 412 kona-ba implementasaun polítika jéneru sei gasta $73,436 no programa ho kódigu 510 kona-ba boa governasaun no jestaun institusionál sei gasta $2,928,976.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here