Membru PN sira aprova alokasaun OJE 2021 ba instituisaun Estadu-sira. Imajen Tatoi/Egas Critovão

DILI, 10 dezembru 2020 (TATOLI)—Proposta orsamentu hosi Ministériu ba Asuntu Kombatente no Libertasaun Nasionál (MAKLN) lideradu Júlio Sarmento da Costa “Meta Mali” ho montante millaun $104,5 aprova iha espesialidade.

Proposta hosi Ministériu ba Asuntu Kombatente no Libertasaun Nasionál aprova rezultadu votasaun a-favór 44, kontra 0 no abstensaun 0.

“Ho nune’e orsamentu Ministériu ba Asuntu Kombatente Libertasaun Nasionál aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kinta ne’e.

Bazea ba livru 2 (Planu Asaun Anuál) previstu medidia prinsipál setoriál hosi MAKLN ba tinan fiskál 2021 mak hanesan promove, asegura kontinuidade inisiativa rekoñesimentu, glorifikasaun libertasaun nasionál no erói sira, fó kontinuidade pagamentu pensaun, bolsa estudu no  apoiu médiku iha estranjeiru ba kombatente sira no oferese kaixaun/urna funerária ba serimónia fúnebre restu mortál mártir no organiza enterru iha jardín erói sira iha Metinaro.

Nune’e mós organiza serimónia komemorativa ligada ba kombatente libertasaun nasionál no istória resente nasaun nian, garante funsionamentu Conselho dos Combatentes da Libertação Nacional (CCLN), promove konstrusaun jardín erói sira no semitériu espesiál ba kombatente libertasaun nasionál no promove boa governasaun no jestaun institusionál iha ministériu refere.

Hosi medida prinsipál hirak ne’e Ministériu ba Asuntu Kombatente Libertasaun Nasionál propoin montante $104,521,000 ba tinan fiskál 2021, inklui montante $93,596,911 destinada pagamentu pensaun ba kombatente libertasaun nasionál liuhosi transferénsia públika.

Montante orsamentu $104,521,000 ne’ebé koloka ba saláriu vensimentu rihun $618,934, bens servisu $ 5,976,605.00, kapitál minór rihun $328,550, kapitál dezenvolvimentu millaun $4, no transferénsia públika $93,596,911.00.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here