Ofisiais F-FDTL.Imajen/TATOLI

DILI, 10 novembru 2020 (TATOLI)—Proposta orsamentu ba tinan fiskál 2021 hosi Forsa Armada Libertasaun Nasionál Timor Leste-Forsa Defeza Timor-Leste (FALINTIL-F-FDTL) aprovadu iha espesialiade ho rezultadu votasaun a-favór 40, kontra 0 no abstensaun 0.

“Ho nune’e orsamentu F-FDTL pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kinta ne’e.

FALINTIL-Forsa Defeza Timor-Leste (F-FDTL), nu’udar forsa armada Repúblika Demokrátika Timor-Leste nian ho misaun jenérika garante independénsia nasionál, integridade territoriál, liberdade no seguransa ba populasaun kontra kualkér ameasa ka agresaun esterna, respeitu ba orden konstitusionál (artigu 1º np 2º Dekretu-Lei nº 15/2006, 8 de novembru).

Bazea livru 2 kona-ba planu asaun anuál previstu medida prinsipál setoriál hosi Ministériu Defeza ba tinan fiskál 2021 mak promove, garante no salvaguarda defeza nasionál, nune’e mós implementa polítika jéneru no promove boa governasaun no jestaun institusionál iha F-FDTL.

Ho medida prinsipál hirak ne’e, instituisaun F-FDTL propoin montante orsamentu $25,171,729.00 ba tinan fiskál 2021, inklui $9,895,000 ne’ebé destinadu pagamentu saláriu ba militár sira.

Hosi montante orsamentu $25,171,729.00 ne’e koloka ba saláriu no vensimentu $9,895,000.00, bens no servisu $11,408,800 no kapiutál minór $1,100,419.00.

Alokasaun orsamentál kada programa ho kódigu 388 kona-ba defeza nasionál sei gasta $22,404,219, programa ho kódigu 412 kona-ba implementasaun polítika jéneru sei gasta $20,000 no programa ho kódigu 510 kona-ba boa governasaun no jestaun institusionál sei gasta $2,747,510.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here