Imajen TATOLI/Osória Marques

DILI, 10 dezembru 2020 (TATOLI)—Embaixadór Uniaun Europeia (UE) iha Timor-Leste (TL), Andrew Jacobs, konsidera loron mundiál direitu umanu importante no merese hetan atensaun hosi Organizasaun Nasaun Unida (ONU) ne’ebé sai hanesan direitu umanu universál.

“Ohin loron importante, liu-liu atu fó hanoin mai ita katak, direitu umanu hanesan buat ida universál no úniku. Tanba ne’e ita hotu nunka para atu esforsu hodi defende direitu umanu,” Andrew Jacobs  hateten lia hirak ne’e hafoin partisipa iha eventu Quiz direitu umanu iha salaun konferénsia Antigu Komarka, Balide, Dili, kinta ne’e.

Diplomata ne’e observa katak, buat ne’ebé kontinua aas mak violénsia, nune’e tenke respeita direitu umanu no  tenke sai nafatin matadalan ba organizasaun internasionál sira-nia asaun no nunka husik ema ida iha kotuk.

Nia mós konsidera jornada direitu umanu importante tebes, hodi komemora no anima ho Quiz direitu umanu ne’ebé loke kompetisaun ba universitáriu sira iha Dili.

Iha kompetisaun ne’e, nia hatutan, universitáriu sira kompostu hosi Universidade Nasionál Timor Lorosa’e (UNTL), Universidade da Paz (UNPAZ), Universidade de Dili (UNDIL), Dili Institute of Tecnology (DIT), Institute of Bussiness (IOB) no Institutu Kristu Liurai (KRISTAL).

Universitáriu sira-ne’e hamutuk ema na’in 25 ne’ebé fahe ba grupu lima, mak hanesan Grupu Mean, Orange, Matak, Azul no Kinur.

“Bainhira termina kompetiasaun ne’e, grupu orange mak sai manan-na’in ba Quiz Direitu umanu ho valór 40 no hetan prémiu laptop ida, pulsa telemovél $100 inklui livru direitu umanu no seluk tan. Ba manan na’in segundu grupu kinur ho valór 39, hetan pulsa telemovél $50 ne’ebé UE oferese ho livru sira,” nia esplika.

Grupu matak ho valór 35 hetan pulsa telemovél $20 inklui livru direitu umanu nian, grupu azul ho valór 34 hetan pulsa telemovél $20 no livru, Grupu lima ikus mak mean ho valór 33, hetan pulsa telemovél $10 ho livru.

“Ami hamutuk ho sentru direitu umanu, CNC, UNTL realiza Quiz direitu umanu ne’e tanba estudante sira bele aprende no aumenta sira-nia koñesimentu kona-ba direitu umanu nian,” nia dehan.

Kona-ba prémiu, diplomata ne’e hateten katak, Uniaun Europeia mak prepara no oferese ba estudante sira ne’ebé kompete iha kompetisaun direitu umanu.

Iha fatin hanesan Diretór ezekutivu Centro Nacional Chega (CNC), Hugo Maria Fernandes, hato’o agradese ba Uniaun Europeia inklui parseiru dezenvolvimentu sira ne’ebé mak apoia hodi eventu ne’e bele realiza Quiz ba loron direitu umanu.

“Agradese ba inisitiva hosi Unian Europeia ho parseiru ba apoiu tomak iha komemorasaun loron direitu umanu,” Hugo hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here