Osan Dolar Amerikanu. Imajen/Espesiál

DILI, 10 dezembru 2020 (TATOLI)—Parlamentu Nasionál aprova ona proposta orsamentu jerál Estadu (OJE) 2021 ba Ministériu Petróliu no Minerál (MPM) ho valór millaun $85,573,288 hodi dezenvolve jestaun rekursu petroliféru no mineral.

Husi montante ne’e Ministériu Petróleu no Minerál koloka ba kategoria saláriu no vensimentu $431,202, bens no servisu $1,082,025, kapitál menór $412,210 no transferénsia públika $83,647,851.

Notísia Relevante :MPM prioritiza rekursu petrolíferu no promove governasaun di’ak

Nune’e sei ezekuta ba programa ho kódigu 401kona-ba jestaun rekursu petrolíferu no minerál sei gasta  $84,203,349 no programa ho kódigu 510 kona-ba governasaun di’ak no jestaun institusionál sei gasta $1,369,939.

“Ho nune’e orsamentu bá Ministériu Petróleu no Minerál ne’e pasa,” Prezidente Parlamentu Nasionál, Deputadu Aniceto Longuinhos Lopes, fó sai iha plenária Parlamentu Nasionál, kinta ne’e.

Ministériu Petróleu no Minerál nu’udar departamentu governamentál ne’ebé responsável ba konsesaun no ezekusaun polítika enerjétika no jestaun rekursu minerál, inklui petróleu no minériu estratéjiku sira.

Fó lisensiamentu no regulasaun atividade estrativa, atividade industriál ba benefisia petróleu no minerál, inklui mós petrokímika no refinasaun, bazeia ba artigu 1º Dekretu-Lei n.º 15/2018, 12 dezembru).

Medida prinsipál setoriál hosi MPM ba tinan fiskál 2021 mak kontinua jere rekursu petrolíferu no minerál.

Hosi medida prinsipál dahuluk ne’e kontinua jere rekursu petrolíferu no minerál nomeadamente: implementa projetu Tasi Mane, promove kapasitasaun ba komunidade iha munisípisiu ne’ebé impaktu direita iha projetu ne’e.

apasita rekursu umanu iha setór petrolíferu liuhosi atribuisaun bolsa estudu, dezenvolve mekanismu ba utilizasaun gás naturál iha atividade ekonómika nasaun nian no maximizasaun investimentu iha setór petrolíferu no mineiru liuhosi estudu, peskiza iha nasaun seluk.

Nune’e mós sei Garante Inisiativa Transparénsia Indústria Extrativa sira (ITIE), asegura sinerjia, kooperasaun internasionál, iha ámbitu ba setór rekursu enerjétiku, kontinua peskiza no dezenvolvimentu petróleu, gás, Terrestre, marítimu, dezenvolvimentu ba lejizlasaun adisionál, regulamentasaun vokasionál ba jestaun efisiente no transparente atividade sira hotu no esplorasaun rekursu petrolíferu no minerál.

Medida prinsipál daruak hosi MPM sei promove governasaun di’ak no jestaun institusionál iha Ministériu no servisu sira-ne’ebé dependente, fortalese instituisaun no eleva kapasidade rekursu umanu.

Entretantu, kinta ne’e PN aprova OJE 2021 ba Ministériu Petróliu no Minerál ho votus a-favór 41 kontra no abstensaun 0.

Notísia Relevante :MPM kontinua dezenvolve rekursu petrolífera

Jornalista :Antónia Gusmão.

Editór :Agapito dos Santos

HAKEREK NO HATÁN

Please enter your comment!
Please enter your name here