DILI, 10 dezembru 2020 (TATOLI) – Família boot Federasaun Wushu Timor-Leste (FWTL), tersa (08/12), enfrenta novidade triste no lutu todan tanba lakon sira-nia máster, fundadór, inspiradór nu’udar mós sira-nia prezidente.
Máster Domingos Mesquita do Rego, tinan 70, hakotu iis iha Ospitál Nasionál Guido Valadares (HNGV), Dili, hafoin halo tratamentu intensivu ba moras ne’ebé afeta ba nia hodi halo nia fizikamente stroke kaman.
Família lubun, liuliu membru-sira Kungfu Máster nian halibur-malu iha matebian Domingos nia rezidénsia iha Mascarinhas, Dili, hodi fó omenajen ikus ba matebian ne’ebé iha nia jornada moris dedika ba ezisténsia Wuhshu iha Timor-Leste.
“Mezmu foin lalais moras ataka nia no ami lori nia ba ospitál, maibé ha’u nia avó di’ak hela. Derrepente iha tuku 06:00 rai-nakaras, tersa (08/12), ami simu novidade triste boot katak ha’u nia avó hakotu iis ona,” haktuir Melania, bei-oan hosi matebian prezidente FWTL, Domingos Mesquita do Rego, bainhira dada-lia ho Agência Tatoli, ohin, iha matebian nia rezidénsia, Mascarinhas, Dili.
Ho Domingos Mesquita do Rego nia mate ne’e, lori triste boot ba família rasik, inklui triste boot ba membru hotu Wushu Timor-Leste nian, tanba ne’e, bainhira halo serimónia funerál ba matebian iha Semitériu Becusse, kuarta (09/12), tuku 18:00 Otl, asiste hosi ema ua’in ne’ebé maioria membru Kungfu Máster ka Wushu.
Sira ho atributu Wushu nian hamriik hale’u matebian nia kaixaun, hasán ka hulan matebian no akompaña hodi lori matebian nia mate-isin sai hosi nia rezidénsia to’o iha fatin deskansa ikus nian iha Semitériu Becusse, Dili.
Matebian nu’udar saudozu ba família Wushu Timor-Leste moris iha Munisípiu Bobonaro, iha loron 18 marsu 1949. Matebian husik hela nia kaben no oan na’in-13; mane-ualu no feto na’in-lima.
Matebian involve iha desportu Wushu ka Kungfu Máster ho idade tinan 12 iha Macau-Xina no nia lori desportu ne’e mai Timor-Leste iha 1962 no kontinua tane hodi haburas to’o ohin loron.
Jornalista : Hortencio Sanchez
Editór : Francisco Simões
