Eis Prezidente Republika, José Manuel Ramos Horta. Imajen/Antonio Goncalves.

DILI, 10 dezembru 2020 (TATOLI)—Eis Prezidente Repúblika, José Manuel Ramos Horta, konsidera protesaun no promosaun ba feto no labarik feto Timor Leste (TL) importante bainhira ko’alia kona-ba kontestu igualdade jéneru iha selebrasaun loron mundiál Direitu Umanu nian.

“Igualdade jéneru no violénsia hasoru feto, ne’e importante tebes. Tanba ne’e, ita selebra loron ba direitu umanu, ita ko’alia kona-ba violénsia kontra feto, maibé violénsia kontra labarik diretamente ligadu tanba akontese iha uma-laran,” Laureadu Prémiu Nobel da Paz, José Ramos Horta, ko’alia asuntu ne’e bainhira partisipa iha eventu Quiz Direitu Umanu ba universitáriu sira iha salaun eis komarda Balide, Dili, kinta ne’e.

Iha biban ne’e, Ramos Horta mós fó obrigadu ba embaixadór Uniaun Europeia (UE) no Nasaun Unida ho parseiru sira, ne’ebé fó apoiu makaas ba Timor-Leste iha área promosaun no protesaun direitu umanu nian.

Eis Ministru Negósiu Estranjeiru no Kooperasaun ne’e konsidera, Timor -Leste bele orgullu tanba iha loron restaurasaun  independénsia 20 maiu 2002, Parlamentu Nasionál (PN) ratifika konvensaun direitu umanu nian iha Timor-Leste.

“Ita urgullu tanba ita-nia PN ratifika konvensaun direitu umanu nian iha Timor-Leste. Promesa ne’e durante ha’u halo iha tempu luta iha ha’u-nia diskursu no dokumenta bele haree. Ha’u ko’alia ona ho Parlamentu Europeia ho ONU hateten nune’e, agora ha’u la fiar rai barak iha mundu sira-ne’ebé independente tinan 60 ona maibé sira ratifika direitamente tratadu ida-ne’e. Ita urgullu tanba ratifika, maibé buat barak sei falla iha área direitu umanu iha Timor-Leste,” Horta hateten.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here